Sumdawnna enfiah turin Action Committee din

Mizoram chhunga sumdawnna kalpui zawng zawng ten dan leh hrai an zawm a, sumdawnna kalpuitu ten permit an neih ngai te an neih ngei theih nan Mizoram Merchant Association (MIMA) chuan dan zawm lova sumdawnna kalpui rinhlelhawm te enfiaha dan anga hma la tur Action Committee an din.
MIMA chuan Mizoram-ah dan zawm lova sumdawnna kalpui an tam hle tih sawiin, Insakna bungrua leh ei leh bar thlengin Home Deliver hmanga zuarchhuaktu an tam zel a, heng sumdawnna hian khawtlang dawr neitute leh rim taka eizawnna atan a lo hmangtu Zofate eizawnna a nghawng theih avangin he thil hi an ngaipawimawh hle tih an sawi a. Mizo mipuite chu ILP Sponsor chungchangah te, Dawr leh Sumdawnna hmun luahtir chungchang ah te, Mizo hming hmanga hnamdang ten sumdawnna an kalpui chungchangah te nasa zawka fimkhur turin an ngen a. A bikin Non-Tribal Sponsor emaw, mahni insumdawnna hmun luah tir emaw, hming hawh a sumdawnna kalpui tir an lo awm a nih chuan arang lama lo in chingfel turin Mizo mipuite an ngen tih an sawi a. Ram leh hnam humhalh nan leh tu leh fate'n an luah chhunzawm zela chimrala a awm loh nan mahni theihna zawn theuhah tan la turin a ngen bawk a ni.

MIMA hian Dan zawm lova sumdawng nia rinhlelhna awm chu thu dik leh finfiah theihna nei Police, Aizawl Municipal Corporation (AMC) emaw, MIMA leh Department mawhphurtu dangte hnenah report turin an ngen a. Thuneitute pawh Trade licence, ILP leh Sumdawn phalna mamawh dangte neih leh neih loh enfiah a dan zawm lohna a awm anih chuan dan ang in hma la turin an ngen nghal bawk a. MIMA Action Committee chuan kan ram leh kan Hnam eizawnna humhalh chu mipuite mawhphurhna pawimawh tak a ni tih hriaa Mizo pui rim taka eizawngte eizawnna humhim pui tur leh ram leh hnam chimral a nih loh nan an hmalakna lo thlawp tlat turin an ngen tih an sawi bawk a ni.