Ramri chungchang inbiakna November thla ah beisei a ni
Home Minister K. Sapdanga'n Akashvani News Aizawl a hrilh danin, Home Department hotuten November thla laihawla Aizawl khawpui a State sawrkar pahnih Official-te inbiakna chhunzawm turin Assam sawrkar thuneitute hnenah rawtna an thlen tawh a. Official-te inbiakna hi ni khat chauh ni lovin ni thum (3) ni turin rawtna siam a ni a, Assam sawrkar lam hian an pawm thu an la rawn hriattir lo na a, an pawm ngei a beisei thu Home Minsiter K. Sapdanga chuan a sawi a. Hun rei tak atanga buaipui tawh State pahnih inkar ramri buai chinfel tuma inbiakna hi boruak tha tak hnuaia kalpui ngei a beisei thu a sawi bawk. Mizoram sawrkar palaite hi Home Secretary Vanlalmawia chuan a ho rin a ni a, Assam lam hi Border Protection and Development Department Secretary-in a rawn ho rin a ni.
Mizoram leh Assam ramri buai chingfel tur hian State pahnih sawrkar Official-te hi nikum April ni 25 khan Guwahati-ah an inbe tawh a. Hemi tum hian inbiak chhunzawm thuai turin thu an dah na a, kumin April thla a Assam Assembly inthlan avang khan inbiakna hi chhunzawm theih a ni ta lawk lo a. State pahnih Official-te an indawr reng chungin Assam sawrkar lam hian rawtna fumfe an neih har avangin inbiak leh hun hi a khawtlai ta a ni.
Mizoram leh Assam inkar ramri buai hi kum 1972-a Mizoram UT a nih atang khan a hluar zual a. Ramri hmun hrang hrangah buaina chhuak zauh zauh thin mah se, ramri buai chinfel tuma inbiak tak tak a awm lova. Kum 2021 July ni 26-a Vairengte dai-a Mizoram leh Assam Police-te an inkah a Assam Police 6 an thih hnu khan inremna siam tura inbiakna hi a taka kalpui a ni ta chauh a ni.
