PHE Minister hovin Swachh Bharat Diwaz 2026 hmang

Faina Hapta (Swachhata Hi Seva) 2026 pualin nimin khan India ram pumah ‘Faina Ni’ (Swachh Bharat Diwaz) chu hman a ni a, Aizawl-ah pawh PHE Department changtu Minister Prof. Lalnilawma hovin he ni hi hman a ni.

Swachh Bharat Diwaz puala UD&PA Auditorium-a hun hman ah hian PHE Minister Prof. Lalnilawma chuan ram chhung hmun dangte ruala Mizoram in Faina Ni hlawhtling taka a hmang thei chu lawmawm a tih thu a sawi a. Faina Ni puala chawimawina dawngte zahna chibai bukin Minister chuan, “Faina chu rilru puthmang atanga intan leh mahni chauh inngaihtuah lova midangte hmakhua atana mahni inhlanna a ni zawk,” a ti a. Mizoram in entawn tur mi ropui tak tak, an hniak hnung zui tur a nei chu ropui a tih thu sawiin, mahni theuh inen a, mahni theuh atanga faina chu bul tan a pawimawh thu te a sawi a. Kalkhawmte chu faina thuchah midangte hmuha a taka nunpuitu nih tum theuh tura chahin, midangte tihhmuhtu ni tura bul tan nan Faina Ni 2026 chu hmang theuh turin duhsakna a hlan nghal bawk.

Nimin-a he hun hman hi UD&PA Department-a Commissioner & Secretary, V. Lalsangliana chuan kaihruaiin khual zahawm AMC Mayor H. Lalremtluanga chuan Faina lama Department leh AMC-te thawhhona leh hmalak zelna tura an hmathlirte a sawizau bawk a ni. Swachhata Hi Seva (Faina Hapta) hi kum 2017 atang khan India ram pumpuiah hman tan niin September 17, 2026 atanga October 2, 2026 chhung hman thin a ni a. Kumin Faina Hapta pual hian faina lama hma la tha mi pasarihte hnenah chawimawina thilpek hlan an nih bakah Faina lama hnathawktute (sanitation worker) mi 95 hnenah PPE Kit hlan nghal an ni bawk.