Operation Trident hmanga State pathum-a hmalakna te Mizoram Home Minister in a sawifiah

Home Minister K. Sapdanga chuan nimin khan thuthar thehdarhtute kawmin ‘Operation Trident’ hmanga Mizoram Police, Narcotics Control Bureau (NCB) leh Directorate of Enforcement (ED) te thawhhona kalpui dan leh an hmalakna hrang hrangte a sawifiah.
Nimin-a a Pisa-a thuthar thehdarhtute a kawmna ah hian Home Minister K. Sapdanga chuan Mizoram Police, Narcotics Control Bureau (NCB) leh Directorate of Enforcement (ED) te tangkawp chuan October 23, 2026 khan Ruihhlo tawlh hluar lutuk tukdaih nan leh ruihhlo tawlha inhnamhnawih nasa, a Kingpin te man chhuah a, Ruihhlo tawlhna hmanraw hrang hrang/Narcotic Trafficking Network te chhuchat tura beihpui ‘Operation Trident’ tia koh chu Mizoram, Assam leh Manipur-ah an kalpui rih sawiin, “Heng Agency hrang hrang atanga lakkhawm Team 38-te chuan hmun 38-ah a rualin Joint Operation neih a ni a, Mizoram chhungah Aizawl, Champhai, Lawngtlai leh Zokhawthar bakah Manipur State-ah Churachandpur leh Assam State-ah Guwahati-ah te beihpui thlak a ni a. He Operation-ah hian mi 18 man an ni a, Detonator 500 leh pawisafai cheng nuai 12 man niin, Bank Account 1424 te freeze a ni a, sum leh pai thil neih hlutna cheng vbc. 17.82 hu te provisional attachment a tih a ni,” a ti.

Operation Trident-ah hian Mizoram-a Drugs kingpin leh an thawhpui te beihna kawngah Intelligence te thawhhona tha tak awmin, ni engemaw zat chhung intelligence thuruk lakkhawm te finfiah a ni thu leh target te thliar hran niin, Mizoram Police leh Central Agencies te inrawnkhawmna High-Level-a neih fo hnuah, he beihpui hi Drugs Syndicate te logistics leh an sum chetvelna a ruala tihchhiatna tur uluk taka duan a ni tih Home Minister chuan a sawi a, “Hmun khat atanga khaikhawmin, felfai taka kaihhruaina (surgical precision) hmangin Multi-Agency composite Team 38 te chu hmun 38-ah a ruala tirh chhuah an ni a, Assam, Mizoram leh Manipur-ah an kal chhuak ta a. He beihpui hian khawpui lian leh ramri bial pawimawh tak – Mizoram-ah Aizawl, Champhai leh Indo-Myanmar ramri sumdawnna khaw pawimawh Zokhawthar te, Manipur-ah Churachandpur leh Assam-a Cachar transit corridor te a huam a. Department hrang hrang thawhhona tha takin tih tur (Search, enquiries, financial audits) engkim tih hlawhtlin a ni,” tiin target te zingah tlan bo emaw, an thil tih dik lo te thupbo hman tumah an awm lo chu a hlawhtlinna a nih thu a sawi a ni.

He beihpuithlakna-a Agency hrang hrangte mi man pawh Home Minister chuan tarlangin, Mizoram Police chuan Assam Police, Manipur Police leh Central Agency te nena tangkawpin Assam leh Manipur hmun hrang hrangah operation an kalpui thu leh Guwahati (Assam) leh Churachandpur (Manipur) atangin mi pahnih ve ve man an nih thu a sawi a. Enforcement Directorate (ED) Aizawl leh Imphal Sub-Zonal Office te chuan Prevention of Money Laundering Act, 2002 (PMLA) Section 17 hnuaiah Aizawl, Champhai leh Lawngtlai (Mizoram) leh Chura-chandpur (Manipur) hmun hrang hrangah money laundering case pathum-ah hma lain Mizoram leh Manipur-a Narco-Trade leh Narco-Hawala Operator te kaihhnawih Bank Account 1424 an freeze a, Mizoram-a awm Narco-Hawala Operator te thil neih cheng vbc. 17.82 hu provisional attachment tih a nih thu leh mi 6 te chu PMLA Section 19 hnuaiah man niin Manipur-ah 3, Mizoram-ah 2 leh Gujarat-ah pakhat an nih thu a sawi.

Heng bakah hian Narcotics Control Bureau chuan Mizoram-ah hmun 13-ah he beihpui hi kalpuiin, mi 7 man an ni a, pawisafai cheng nuai 12 leh Detonator 500 te chu misual kut atanga man a ni tih a sawi a. Operation chhung hian Lalduhawma leh Suitei te chu Aizawl-ah man an ni a, Teresa, Lalbiakhluna, Lallian-sanga, Pency leh Laltlanzova Pautu te chu Champhai atanga man an nih thu a sawi bawk.