NGHAM ten an zavai-a zawm tlan theih inbiakremna neih thuai an beisei
Inrinni kalta a thuchhuah an siamah Non-Government Hospital Association of Mizoram (NGHAM) chuan Health Minister-in tunhnaia MUHCS zawm tura a sawm bik nia a sawi Hospital pathum - Ebenezer Medical Center, Trinity Hospital leh LRM Hospital te bakah Hospital dang la zawm lo tlemte chauh an awm tawh tih tarlangin, chungte chu - Aizawl Hospital, Greenwood Hospital, Adventist Hospital (Kohhran Hospital), Rosewood Hospital (Psychiatry Hospital), City Hospital leh Agape Multispeciality Hospital te an nih thu an tarlang a. “Heng Hospital zawng zawngte hian MUHCS zawm turin sawrkar kan bia-in kan hriattir tawh a, thil tul leh pawi-mawh thehluh ngaite thehlutin sawrkar lam hi kan ngaichang reng tawh zawk a ni,” an ti a. “MUHCS hi NGHAM member Hospital thenkhat chauhin kan zawm a nih chuan a zawm ve lo Hospital te tan tlakchhiatna a thlen theih dawn avangin Mizo takin pheikhai rual taka kal hi a thain kan hria a, kan zavaia kan zawm theihna tura inbiakrem thuai hi kan beiseiin kan lo thlir reng a ni,” an ti bawk.
NGHAM chuan Hospital hrang hrangte chu an Hospital dinhmun leh Grade te a inan loh avangin rate pawh a inang vek thei lo tih an hriat thu tarlangin, “Chuvangin kan Hospital Grading min pek ang zela awm chungin tuna kan dinhmun sa aia kan chhiat lohna tur tal rate min pe turin kan beisei a ni,” an ti a. Chutiang chu Hospital inrelbawl nan a pawimawh avangin John Williams Hospital, Lunglei pawhin Synod Hospital, Durtlang rate tho an hmang mek niin an tarlang a ni.
Private Hospital dintute chu Entrepreneur te niin risk sang tak lain Medical lamah kan ramin hma a sawn ve nan an theih ang zela hma la thin tu an nih thu pawh tarlangin, “Mizoram a entrepreneur te zingah chuan thalaite tan hna siam tam berte zinga mi pawh kan niin kan hria a ni. Hna siam piah lamah damlote phai lama refer ngai a tlem zelna tur leh ram dang atang pawha pan tlak Hospital nih tumin hma kan la mek zel a ni. Entrepreneur hma ngai em em, kan nu leh pa a kan ngaih, sawrkar pawhin kan tan a tha turin min ngaihtuah sak zel ang tih kan ringin kan beisei tlat bawk a ni,” an ti a ni.