NEP 2020-a inkaihhruaina leh tih tur awmte tihlawhtling turin Mizoram-ah hmalak a ni

India sawrkarin zirna hmasawnna tura a duan National Education Policy (NEP) 2020 hnuaia inkaihhruaina leh tih tur awmte tihlawhtling turin Mizoram sawrkar pawhin kawng hrang hrangin hma a la a; zirna pawhin hma a sawn chho hle niin sawrkar hotute chuan an sawi.
Mizoram-a Zirna sang lam - College hrang hranga NEP 2020 kalpuitu Higher & Technical Education (H&TE) Department hotute chuan Akashvani News Aizawl zawhna chhangin, NEP 2020 chu kum 2023-24 atangin Mizoram-ah kalpui a nih thu an sawi a, H&TE Commissioner kaihhruai State Level Task Force Committee on NEP 2020 din a ni a, anni hian hmalakna tur hrang hrangte an duang a, NEP kalpui a nih hnu hian zirlaite pass percentage pawhin hma a sawn chho zel niin an sawi a ni.

H&TE Department hotute chuan, NEP 2020 an kalpui hian Mizoram University hnuaia College inziaklutte a huam thu an sawi a; NEP 2020 kalpui a nih hnu hian zirlaite hian an zirlaibu piah lamah kutthemthiamna an neih theih nan zirtur (course) hrang hrang 64 duan a ni a, hengte hi College zirlaite hian an duh ber thlangin an zir a, an College Zirtirtuten an zirtir theih piah lam chu pawnlam mi ruaiin zirtirna kalpui a ni tih an sawi a; hei hian zirlai tam takah mahni kutkawih eizawnna a pek thu an sawi bawk. 

NEP 2020 hnuaiah hian College zirlai naupangte tan thiamthil an zir theihna tur Skill Enhancement Course (SEC) 64 kalpui a ni a, heng Course 64 zingah hian zirlaiten an duh ber pakhat thlangin, chung an Course thlante chu Zirtirtuten a theih anga an zirtir bakah pawnlam mite ruaiin an Outsource thin a, SEC atan hian sawrkar chuan kum khat atan budget-ah cheng nuai 75 dahin, Course thenkhatah PM-USHA atangin Fund pek an ni bawk a. Zirlaiten Course an thlan thin zingah Information Technology kaihhnawih thiamthil zirna te, Cake leh Chhang siam (baking) te, ei in siam te, Electric House Wiring te leh Beauty & Wellness-te chu a langsar zual an ni.

NEP 2020 kalpui hnu hian College tinah NEP kaihhnawih thil pawimawh buaipui turin NEP Ambassador leh NEP Cell din a nih thu H&TE hotute chuan an sawi bawk a; NEP-in a rawn kentel, Internship Programme chu zirlai ten an nei thei tawh a, zirlate hian sawrkar Office-ah te, NGO hmunah te, sumdawnna hmun leh Industry-ah te Internship Programme an hmang a, hei hi kum danga la awm ngai lo thil tha leh tangkai tak a nih thu an sawi bawk a ni.