NEC Secretary in zan khat riakin Thenzawl a tlawh

North Eastern Council (NEC)-a Secretary, Satinder Kumar Bhalla chuan Zirtawpni kalta khan zan khat riaka Thenzawl tlawhin khawtlang hruaitute a kawm bakah Thenzawl-a hmun hrang hrangte a tlawh bawk.
Mizoram-a rawn zin NEC Secretary hian Zirtawpni khan Thenzawl thlengin hemi ni hian Thenzawl Golf Course & Resort-ah Then-zawl khawtlang hruaitute leh NGO hrang hrang hruaitute a kawm a, Thenzawl khua a Tourism hmasawnna tur leh NEC atanga hmasawnna thlen theih turte an sawiho a, zan lamah Mizoram Tourism Development Authority-ten Cultural Programme buatsaih sakin zanriah an buatsaih sak bawk.

Inrinni khan NEC Secretary Satinder Kumar Bhalla hian Vantawng Khawhthla leh MV Handloom-a Puantahna hmun te a tlawh bawk a, Thenzawl chu khualzinte tlawh nasat khua a nih avangin khualzin hip thei hmunte tihchangtlun leh hmasawnna ruhrel siam chungchang sawrkar hotute leh khawtlang hruaitute a sawipui a; puantahtu ten hma an sawn zel theihna turin hmalak mek a nih thu a sawi bawk. He hunah hian NEC Secretary hi OSD to Chief Minister R. Lalrodingi bakah Planning Department atangin C. Lalnunsiami leh Tourism Department Officer-ten an tawiawm a ni.