Mizoram State University dinna turin Lunglei-ah mimal in ram pein inhlan a ni

Mizoram State University (MZSU) dinna atan Lunglei Ramzotlang Serkawn-a cheng P. Lalnuntluanga te chhungkua chuan Lunglei Serkawn ram chhungah ram bigha 12-a zau chu Mizoram sawrkar hnenah pein nimin khan Lunglei High Powered Committee (HPC) Conference Hall-ah Chief Minister & Lunglei High Powered Committee (HPC) Chairman Lalduhoma kutah ram inpekna lehkha a hlan.
Nimin-a hemi puala hun hman ah Chief Minister chuan Mizoram State University dinna turah sawrkar laipuiin inngaihtuah nan State sawrkar chu kum 15 hun a pek thu sawiin, kum engemaw zat la awm laia a hmun tur tihfel a ni ta chu lawmawm a tih thu a sawi a. A hmun tihfel chu Class la a, a taka kalpui nghal tur tihna a nih loh thu sawiin, a hmun neih bakah, infrastructure hrang hrang – building, kalkawng, tui, eng leh tih tur hmabak tam tak a awm thu leh zirtirtu (faculty) lak te pawh hmabak a la awm thu a sawi a. Hetih lai hian a bul tan tur, Office hawng nghal tur leh a tul tul thawk tura ruahmanna siam mek a nih thu sawiin, anni hian a hmuna thut chilhin, a tahtawlin a tul anga hma lak zel a ni dawn tih a sawi a ni.

Chief Minister chuan MZSU dinna atan ram pe thei tlawmngai tam tak an awm tih sawiin, an inphalnaah lawm thu a sawi a. Ram tha leh remchang tak, bigha 12 laia zau petu P. Lalnuntluanga te chhungkaw chungah Mizoram sawrkar leh HPC aiawhin lawm thu a sawi a. An ram pek chu a hmun hma a remin, Education Complex anga cheibawl theih a ni dawn tih sawiin, chutiang ram tha hmuhna tura HPC thuneitute'n taima leh thahnem ngai taka hma an lakna leh theihtawp an chhuahnaah lawm thu a sawi a. Sawrkar hmalakna atana mimal ram pe phal an awm thin chu lawmawm a tih thu sawiin, ram inpek chungchanga inremna te tha taka kenkawh a, record fel tak neih a tul thu a sawi.

Hemi puala hun hman hi HPC Vice Chairman V. Malsawmtluanga MLA chuan kaihruaiin sawrkar mi pawimawh hrang hrang an tel a, LMC Chairman Lalzuithanga, YMA Sub-Headquarters Lunglei President K. Lalfakzuala, MZP Headquarters Lunglei President leh MZSU Demand Committee Chairman H. Lalhmingmawia leh Rev. Dr F. Sangvela te'n lawmthu an sawi bawk a ni.