Mizoram-a ruihhlo man chhuina kaihhnawih ah ruihhlo-a sumdawnna leh thildang hmuhchhuah a ni
Hemi chungchang tarlan danin NDPS Act, 1985 hnuaia thubuai, nikum March thlaa Heroin kg 4.722 (Hawng 440) manna leh nikum August thlaa Seling daia Methamphetamine kg 49.101 manna bakah kumin July thlaa Manipur Police-in Churachandpur (Manipur)-a Brown Sugar kg. 2.413 man a nih chungchang Enforcement Directorate-in a chhuina kal zelah Myanmar atanga hmarchhak State kaltlanga ruihhlo hmanga sumdawnna leh pawisa thianghlim lo chetvelna lian tham zawk hmuh chhuah a ni a. Enforcement Directorate leh Narcotics Control Bureau tang dun bultumin Zirtawpni, October ni 23 khan Aizawl, Champhai, Lawngtlai leh Churanchandpur-a heng thubuai nena inkungkaihna nei hmun engemaw zat an dap a. Mizoram leh Manipur-a pawisa thianghlim lo chetvelna atana hman Bank Account 1,424 leh Champhai Zion Veng-a Lalliansanga hminga awm ‘HOTEL JTS’ te chu hren an ni bawk.
Lalliansanga leh a nupui, Lalrampari-te Bank Account-ah hian ramchhung hmun hrang hrang atanga ruihhlo hralhna pawisa, Burma pawisaa thleng turin India pawisa cheng vbc. 268.80 a lut tih hmuhchhuah niin, cheng vbc. 125 chu a sum faiin an dawng tih hriat a ni a. Myanmar leh ramchhung hmun danga ruihhlo hmanga sumdawngte pawisa chetvelna buaipuitu niin an pawisa dawn khawm atang hian In leh lo, Hotel JTS leh sumdawnna hmun dang an din nual tih Enforcement Directorate chuan a tarlang a ni.
Enforcement Directorate (ED) Aizawl leh Imphal Sub-Zonal Office hnathawkte chuan Mizoram leh Manipur-ah bungrua cheng vbc. 26 leh nuai khat hu an hreng tih nimin khan thuchhuah siama tarlangin, Enforcement Directorate (ED) Aizawl leh Imphal Sub-Zonal Office a thawkte chuan Zirtawpni khan Prevention of Money Laundering Act, 2002 section 17-na tlawhchhanin Aizawl, Champhai leh Lawngtlai bakah Manipur-a Churachandpur-ah hmun tam tak an dap a. An hmun dapte hi Myanmar atanga Heroin, Methamphetamine leh Brown Sugar tawlhrukna nena inzawm an nih thu tarlangin, hmun hrang hrang an dapna-ah hian Narcotics Control Bureau (NCB) leh Mizoram Police te’n an tawiawm a. Mizoram bika ruihhlo hmanga sumdawnna behchhana bungrua khawih chet theih lohva an hren hi cheng vbc. 17.82 hu zet a ni.
