Mizoram-a pawikhawihna avanga man mi 12,958 te NAFIS hnuaiah chhinchhiah an ni tawh
Forensic Science Laboratory (FSL) Directorate in an tarlan danin India rama pawikhawihtute chhinchhiahna National Automated Fingerprint Identification System (NAFIS) hnuaiah kumin September thla thleng khan Mizoram-ah pawikhawih vanga man mi 12,958 chhinchhiah an ni tawh a, heng bakah hian Automated Fingerprint Identification System (AFIS) hnuaiah pawh pawikhawih avanga man mi 5,982 chhinchhiah an nih tawh thu sawiin, AFIS hnuaia chhinchhiah te hi thiamloh chantir tawh, Convict mi 3,373 leh pawikhawih vanga man dang mi 2,609 an ni tih an sawi.
Forensic Science Laboratory Directorate chuan kumin chhungin September thla thleng khan case 1,073 an dawn tawh thu leh pawikhawihna bungraw zirchian ngai, Exhibit 5,054 an dawn tawh thu an sawi a. Hmun hrang hrang atanga case an zirchian tawh chu case 1,118 leh exhibit 6,757 a tling tawh a. Pawikhawihna hmun (crime scene) 86 a hmunah an enfiah tawh a, an hnu chhui leh zirchian kaihhnawih ah Department mi te Court-ah tum 317 an inlan tawh bawka ni.
Forensic Science Laboratory Directorate hian an din tirh atang khan Police Station hrang hrangte case an buaipui thin bakah Excise & Narcotics Department te case an buaipui thin bawk a. Heng bakah hian ACB Corruption Case, DP&AR, Mizoram Women Commission, Child Welfare Committee, Forest Department, Government Medical Institutions, Hospitals, Veterinary Institutions, MBSE leh Bank te case hrang hrang an buaipui thin a. High Court leh District Court hnuaia case bakah sawrkar laipui pisa - Customs, Revenue Intelligence, National Investigation Agency, Narcotic Control Bureau leh Assam Rifles te pawhin an case hrang hrang kaihhnawih zirchian ngai bungruate an thawn ve thin a ni.