Mizoram mawina tarlan tam theihna tur Hunpui buatsaih tichangtlung tura hmalak a ni - Tourism Minister
Tourism Department leh Horticulture Department tangkawp buatsaih ni thum awh 'Anthurium Festival 2026' chu Inrinni khan Reiek Tourist Resort-ah a kharna hun hman a ni a, he hun hi Tourism Minister Lalnghinglova Hmar chuan hmanpuiin Anthurium Festival chu kum hnih chawlhsan lailawk a nih hnuin tunah kalphung (concept) thar - Mizo Culture leh Nature pholang thei thilte bakah Adventure lam tui mite tana chhenfakawm thei tur zawnga hmalak thar a nih thu a sawi a. Tourist tam lehzual hip a nih a, ramdangte hnena Mizoram hmel mawi lehzuala tarlan a nih theih nan Festival chi hrang hrang, Winter Festival, Hnahsin Kut, Leitlangpui Music Festival, Sakawrhmuituai Sunset, Tlaizawng Paradise leh a dangte pawh tih changtlun a, hmun hrang hrangah chhenfakawm zawka kalpui zel tum a nih thu a sawi a. Hnamdang te'n min lo tlawh mai a tawk lo tih sawiin, “Mizo leh Mizo, Mizoram-a chengte kan intlawhpawh tam a ngai a, chumi che vel chuan kan economy a siam ni,” tiin, “Tourism hmangin Mizoram chawikan kan tum a ni,” a ti bawk.
Anthurium Festival hi October ni 1, 2026 khan Horticulture Minister C. Lalsawivunga'n a lo hawng tawh a; Festival neih chhung hian Ailawng leh Reiek-ah activity hrang hrang - Ailawng Tlang Trekking, Khuangchera Puk leh Thawm-pawnga Puk Cave Expedition, Cable Foot Bridge leh Film City Visit te; Reiek Tlang leh Ngai Tlang Trekking, Ngaitei Puk, Zokhua Live Experience, Nghakuai Chiah, Mizo Indigenous Games, Rifle Shooting, Rose Garden Visit leh Kids Play Area te buatsaih a ni a; Anthurium Exhibition cum Sale leh Food Stall leh Local Product Stall te pawh hawn a ni bawk.
Tunhnaiah Mizoram-ah khualzin (tourist) an pung zel a, chhinchhiah danin kumin January atanga August chhung ringawt pawh khan Mizoram-ah tourist mi 6,74,911 an awm a ni.