Mizoram hmun 7-ah Oil leh Gas zawn nan lei verhin Meidum hmunah chiah Gas hmuh a la ni

Mizoram hmun hrang hrang hmun sarih (7)-ah leihnuai hausakna Oil leh Gas zawnna atan verh a ni tawh a, heng zingah hian Meidum hmuna Gas hmuh bak chu hmun dangah leihnuai hausakna hi hmuh a la ni lo.

Centre for Disaster Management, Mizoram University buatsaiha 'Two Day Seminar on Fire and Financial Management for Disaster Management' chungchang zirhona tunhnaia neihah mithiamte chuan Oil leh Gas a awm leh awm loh zawngin Mizoram chhunga hmun sarih-ah lei verh a ni tawh tih an sawi a. Hengte hi OIL India Limited in hmun li- Maubuang, Thenzawl, Keifang leh Phulmawi hmunah leh ONGC in Hortoki, Meidum leh Zanlawn hmunah te a ni tih an sawi a. Heng hmun hrang hrang an verhna ah hian Maubuang hmunah chuan tlem an hmu a, mahse buaipui tham a tling lo niin an sawi a, Meidum hmuna ONGC in an hmuh chu eng zata tam nge tih a la hriat loh niin an sawi bawk.

Mizoram-a Oil leh Gas zawn hna hi ONGC (Oil and Natural Gas Corporation) leh OIL (Oil India Limited) ten thawkin an hnuaiah hian Company engemaw zat thawhpui an nei a. ONGC hian Assam–Manipur–Mizoram ramri leh hmar lamah hna an thawk a. OIL hian Mizoram laili leh chhim lamah te hna an thawk bawk a. Leiverh chu a hautak thu leh Mizoram chu a ram leilung pianzia (terrain) in a zir loh avangin duhna hmun hmunah lei a verh ngawt theih loh tih an sawi a. Leiverh tura hmanraw lakkhawmna tur te, lirthei lian kalna turte a ngaih avangin kawng atanga hla deuhah chuan leiverh a rem lo tih an sawi a, khur khat verhna atan hian cheng vbc. 150 vel a ngai niin an sawi bawk. Lei hnuaia Oil leh Gas chu midangin an hip sak thei tih sawiin mithiamte chuan, “Mi dang bloc pakhat atanga midang chan ami an lo hipsak chuan case lian tak an awrh thin a. Chu mai bakah an siamchhuah (production) zawng zawng atanga chhutin 90% an peklet a ngai a ni. Hei vang hian khur inhnaiha awm te chu inberemin ruahmanna an siam thin a ni,” an ti.

Leiverh vanga hamthatna awm thei te tarlangin, hnathawh laiin a tam thei ang ber tualchhung mi chhawr an ni thin a, hei bakah hian a zawnna atan hian State sawrkarah Chhiah chawi anih bakah leihnuai hausakna hi hmuh anih chuan Gas bikah deuhchhuah atanga 12.5% leh Oil-ah 10% chhiah State sawrkarin a la thin niin an sawi bawk a. Director General of Hydrocarbons chhinchhiah danin kum 2023-2024 khan India ram hmun hrang hrangah Oil leh Gas zawnna atan hmun 741 verh (drilled) a ni a, kum 2025-2026 chhungin hmun 674 verh a ni bawk.

Hetihlai hian Tripura (Panisagar) atanga Mizoram (Sihhmui, Sairang) thleng tur Gas pipeline phum hna chu chak taka thawh chhoh zel a ni a. He Natural Gas pipeline hi a vaiin km 119.5 a thui tur a ni a, heng zinga km 104 chu Mizoram huam chhungah a awm dawn a, a bak zawng hi Tripura-ah a awm thung ang. Gas pipeline siam hna hi 45% chuang zawh a ni tawh a, he hna thawhna atan hian cheng vbc. 491 ruahman niin Pipeline siam hna hi Indradhanush Gas Grid Limited chuan an thawk a, December 2027 hmaa zawh vek tum a ni.