Mizoram-ah nikum chhungin raicheh 23 leh ni 28 aia sen thi mi 171 an awm

Mizoram-ah nikum 2025-26 chhung khan Raicheh-a thi mi 23 leh nau ni 28 aia sên thi 171 an awm.

National Health Mission (NHM) Mizoram hnuaia Reproductive, Maternal, Newborn and Child Health (RMNCH) Report hnuhnung ber, kum 2025-26 Report-in a tarlan danin, sawrkar kum liamta April ni 1, 2025 atanga March ni 31, 2026 chhung khan Mizoram-ah Raicheh a thi mi 23 awmin, Aizawl District-ah mi 8 thiin an tam ber a, Lunglei District-ah 6, Lawngtlai District-ah 3, Kolasib leh Mamit District-ah 2 ve ve leh Champhai leh Siaha District-ah pakhat ve ve an awm a, nau neih zawha thipût chu an thih chhan langsar ber a ni.

Nikum 2025-26 chhung khan Mizoram-ah ni 28 hnuailam nausen thi 171 an awm a, kum khat (1) hnuailam thi zawng zawng (Infant Deaths) hi 306 awmin, kum 1–5 inkar thi 68 an awm bawk a; nikum chhung khan kum 5 hnuailam thi hi an vaiin 374 an tling a ni.

Nikum 2025-26 chhung khan Mizoram-ah nau nei 20,018 awmin, heng zinga 18,555 (92.69%) chuan damdawi In-ah nau an nei a, midang 1,463 (7.31%) chuan In lamah nau an nei thung a. In lama nau neih hi Lawngtlai District-ah 622 awmin an tam ber a; Mamit District-ah 310 leh Lunglei District-ah 330 awmin, In lama nau nei tam zualna District an ni.