Mi-PRAGATI in hmasawnna hnathawh an thlirho

Sawrkar hmalakna lian zualte hnathawh enzuitu, Mizoram Pro-Active Governance and Timely Implementing (Mi-PRAGATI) chu nimin khan Chief Minister Lalduhoma hovin CM Conference Hall-ah an thukhawm a, PWD Minister Vanlalhlana leh EF&CC Minister Lalthansanga te bakah Advisor to the Government of Mizoram Dr. Renu Sharma, GAD changtu Principal Secretary Sudhir Kumar bakah mi pawimawh dangte an tel a ni.
He thutkhawm ah hian sawrkar hmalakna hrang hrangte thlirho a ni a, Serchhip District chhunga Neihloh khaw sawn tuma Neihloh khaw thar hmalakna ah a panna kawng formation cutting an zo tawh a, pavement zui tur a ni a. In sakna chu 2nd Instalment pek tawh an ni a, a hlawmin rangva rawng inang lei tura hmalak mek a ni tih tarlan a ni a. A tira chhungkaw awmte bakah dilna 18 a lut leh a, endik mek an ni tih tarlan a ni.

Aizawl Western Side By-pass road chu hmun thenkhatah a kalna tur tihdanglam deuh hlek (Change of Scope) rawt niin Ministry phalna nghah mek a ni a. Hna hi a thawh theihna hmunah thawh reng a ni a. Zaa 33.61 vel thawh zawh tawh a ni. Kawngin a paltlanga Quarry neituten zangna-dawmna an phut chu uluk taka zirchian a nih hnuah Meeting hian quarry neitu mi 10 tan assistance Rs. 91,91,229 pek an remti a, zangnadawmna dang la tihfel lohte pawh tun thla chhung hian pekchhuah theih beisei a ni. Aizawl Western by-pass road hi km 45 a thui, Lei lian (Major) 2 leh a tenau (minor bridges) 8 bakah Culvert 237 vel nei tura ngaih a ni a. PCC side drain km 30 a thui a nei bawk ang.

Vairengte - Sairang 4 Lane pawh en ho niin Package paruk-ah thendarh an ni a, package tinte hmasawnna hi a indawta sawiho a ni a. Compensation la pek fel loh, Joint Verification Team-te endik tawhte chu a ranglama pek chhuah theih beisei a ni a. Aizawl Chawnpui Veng-a Ekta Mall sak mek chu hna 24.50 % thawh zawh tawh a ni a. Nakum March thlaa thawh zawh hman tum a ni a. Tualpui - Champhai Road Single Lane (NESIDS) chu km 21.058 niin Sanction Amount chu cheng vbc. 57.01 a ni a, tunah hian fund hi cheng vbc. 13.60 release tawh a ni a, hna hi zaa 12.08 thawh tawh a ni a. AgriStack - Digital Services to Farmers, Ministry of Agriculture & Farmers Welfare bultuma kalpui mek pawh sawiho a ni bawk.