Lengpui Airport chei that hna thawh mek March, 2027-ah chuan zawh vek theih beisei a ni
Mizoram State Project Monitoring Committee (MSPMC) hian tunhnai khan Lengpui Airport hi a tum ngana atan an enfiah leh a, Departure Ramp kawng tawpa thlawhna tumhmun zawl a zuk pawhna chu a chhuk lutuk a, thil rit leh damlo nawr te tan chetsual a awl dawn niin an hria a. Hei bakah hian ramp bultanna chu Security Hall aiin a sang a, a bang pin a nih loh avangin Hall chhungah tui a lut thei bawk a, hei pawh hi a fel lo hle niin an hre bawk a. MSPMC Vice Chairman RL. Rinawma chuan Lengpui Airport siam hna chu a bilh atanga tho lo nia a hriat bakah hnathawktu thlan dan leh contract inremna ziah dan pawh a fuh lo niin a sawi a. MSPMC Secretary Er. Lalthanzuala Ralte pawhin Airport cheithat danah duhthusam lo lai a awm nual tih sawiin, hnathawktute inkarah thawhhona tha a awm loh bakah hna inkalthelh a awm a, hei hian hnathawh a ti chak lo tih a sawi bawk.
Khualzinte chhuahna tur (First floor) siam hna chu zawh ni tawhin November thla chhungin Inchung lamah zin chhuak turte tan hman theih a ni tawh dawn a, hmundang atanga lo lut (arrival) te erawh Ground floor-ah hian an la awm dawn a, tum anga hnathawh theih anih chuan Ground floor cheithat hna hi January, 2027-ah chuan zawhfel hman an inbeisei a ni.
Official te sawi danin Airport-a Light chhia a tam hle a, Security Hall area-a light 46 zinga 16 a chhia a, hmun danga light 94 zinga 59 a chhe bawk a, bathroom tui pawh a put ve ve niin an sawi bawk a. Power supply chungchangah Power & Electricity department thawktute chuan an tum anga hmalak anih chuan harsatna a awm dawn lo niin an sawi a. Lengpui Airport hian power 1.5 MVA (MegaVolt-Ampere) vel a mamawh niin an sawi a. Generator 500 KVA pahnih bun tum a ni a, tuna awmsa bakah 1000 KVA pahnih lei belh tum a ni tih an sawi bawk. Power pangngai pawh Sihhmui atangin line hnih hmanga Lengpui Airport chu pek anih bakah Aizawl atang pawhin direct line hmanga pek a ni tih an sawi a, Khawl leina leh mamawha hman atan cheng vbc. 4.62 chu sawrkarin a pe (sanction) tawh niin an sawi bawk.
Lengpui Airport hnathawh viltu PWD thawktute chuan Concrete a chak tawk lo nia sawi chu NIT ten an enfiah (test) hnuah a chak tawk tawh niin an sawi a, First floor chhuat do that hna chu a hmar lam thawk zo tawhin a chhim lam erawh departure floor-a awmte inchung lama an insawn hunah an thawk tan thei dawn chauh niin an sawi thung a. Departure floor luhka khuhna tur Front canopy chu thil man sang zel avangin a tira ruahman ang chuan tih a remchang dawn lo niin an sawi a, January 2027-ah chuan zawh hman an in beisei tih sawiin, Airport cheithat hna hrim hrim chu March 2027-ah chuan zawh vek theih an beisei tih an sawi bawk.
Lengpui Airport cheithat hna hi SCA sum cheng vbc. 30.41 leh NESIDS sum cheng vbc. 19.59 hmanga thawh niin Contractor pahnih Zoramchhana, Electric Veng, Aizawl leh Kamlova Chhangte (KR Construction), Thuampui, Aizawl te thlan an ni a. Zoramchhana hian March ni 10, 2021 atangin hna a thawk tan a, September ni 10, 2022-a zo tur ni mah se tun thlengin ala zo lo a. KR Construction hian September ni 30, 2021 atanga hna tanin March ni 30, 2023-ah zo tura niin March ni 20,2025 khan an zo a, Completion Certificate pek a ni tawh thung. MSPMC hian endikna an neihna ah Contractor te lehkha leh tawngka pawha hriattir an ni chunga Contractor pahnihte an rawn lang lo chu an ngai thutak hle tih an sawi bawk.
