Kumin chhungin Mizoram-ah kangmei chhuak vanga bungraw kangchhia vbc. 4.75 hu tling tawh
Fire & Emergency Services Department chhinchhiah danin, kumin chhungin Mizoram-ah chenna In kang 37 a awm tawh a, ram kang (forest fire) 58 awm tawh bawkin, kumin chhungin kangmei vanga nunna chan mi pakhat a awm tawh a. Kumin chhunga kangmei chhuah nasat ber thla chu March thla kha niin hemi thla-ah hian In kang 10 awmin, ram kang 28 a awm a, bungraw kang chhia hlut zawng chu Rs. 1,69,94,500 hu a tling a ni.
Nikum 2025 chhung khan Mizoram-ah chenna In kang 31 awmin, ram kang 164 a awm a, kangmei vanga thi pakhat a awm laiin hliam tuar pakhat a awm bawk a, kangmei chhuaka bungraw kangchhia hlut zawng chu Rs. 4,68,84,530 hu a ni bawk. Nikum chhunga kangmei chhuah nasat ber thla, March-ah chenna In kang paruk awmin, ram kang 92 a awm a. Hemi thlaa bungraw kang chhia hlut zawng chu Rs. 3,00,62,330 a tling a. Kum hmasa, 2024 chhung khan Mizoram-ah kangmei chhuak vanga bungraw chhia Rs. 8,84,57,960 hu a awm a, kangmei vanga thi pali an awm bawk a ni. Chhinchhiahna atanga a lan danin kum 2012 atanga kumin 2026, kum 15 chhungin Mizoram-ah kangmei vanga thi mi 52 an awm tawh a, kangmei vanga thi awm tam ber kum chu kum 2022 niin mi 15 an awm a ni.
Fire & Emergency Services hotute chuan kangmei chhuak thei pumpelh nan electric wiring uluk taka siam a, MCB hmang theuh turin chhungkaw tin te an ngen a, Gas hmanga eirawngbawl leh thing tuah thuk hmangte pawhin thuk hman zawhah uluk taka timit thin turin an ngen bawk.
Ram kal ten ram kalnaa an meituah/chhem tha taka timit tur leh Ar leh Vawk vulhten an ranvulhna atanga kangmei tichhuak thei Thuk leh electric hrui zam uluk zawk thlithlai reng turin an ngen a, mi tupawhin zial zuk bung timit tha lo a khawi hmunah mah paih loa kang mai thei thil - petrol/diesel/gas/khawnvartui zuarten kang thelhna hmanrua (fire extinguisher/sand bucket) inchhawp ngei tura ngen bawkin, hei bakah hian kangmei a chhuaha tanpuitu kan kohin chhiatna thlenna hmun chiang taka hrilh thin turin mitin te an ngen a ni.