Kum 42 chhungin ruihhlo vanga thi 2,038 an awm
Mizoram sawrkar Excise & Narcotics Department chhinchhiah danin, kum 1984 atanga kumin September ni 25 thleng khan ruihhlo vangin Mizoram-ah mi 2,038 an thi tawh a; heng te hi mipa 1,788 leh hmeichhia 250 an ni a. Kumin 2026 bikah September ni 25 thleng khan ruihhlo vanga thi mipa 35 leh hmeichhia 6, an vaiin mi 41 an thi tawh a. Kumin chhunga ruihhlo vanga thite hi kum 18 atanga kum 56 inkar an ni a, mitthi zinga 17 hi Heroin No.4 vanga thite niin an tam ber a ni.
Kum 1984 atanga chhiara kum khat chhunga ruihhlo vanga thi tam ber kum chu kum 2004 niin hemi kum hian mi 143 an thi a; kum 2000-ah mi 139, kum 2001-ah mi 101 leh kum 2003-ah mi 136 an thi a, nikum 2025 chhung khan ruihhlo vanga thi hi mi 118 an awm bawk. Heng kum nga te hi kum 42 chhunga ruihhlo vanga thi mi 100 an tlinna kum awmchhunte an ni.
Kum 42 chhung hian Spasmo Proxyvon/Parvon Spas vanga thi mi 1,161 awmin an tam ber a; Heroin vanga thi mi 324 leh ruihhlo chi hrang hrang leh damdawi dang tihpawlh vanga thi hi mi 553 an tling tawh bawk. Excise Department chhinchhiah chinah ruihhlo vanga thi zinga naupang ber chu kum 14 mi niin, a upa ber chu kum 58 mi a ni.