Health Worker 100 lakna Advertisement thiatin a thar-a chhuah tha leh turin ti
Justice Mridul Kumar Kalita thutna High Court Bench chuan kar kalta Ningani khan thutlukna hi siamin Health Worker hna lakna atana Advertisement tihchhuah, Direct Recruitment a Health Workers 100 lakna tur chu hnawlin Advertisement hi chhuah tha leh turin Health Services Director chu a hriattir a. Advertisement chhuah that turah chuan direct recruitment a lak tur tih tichiang tur leh ‘Government of Mizoram Regularization of Centrally Sponsored Scheme (CSS) Employees Scheme, 2024’-in a ruahman angin National Health Mission (NHM) hnuai a CSS hnathawkte dah nghehna tur post zat tarlang tel turin a hriattir a ni.
Court chuan Mizoram sawrkar chu NHM-a contract a thawk mek Health Worker-te dah ngheh theih zat tur tichiang turin a hriattir bawk a. Chu chu ‘Government of Mizoram Regularization of Centrally Sponsored Scheme (CSS) Employees Scheme, 2024’ Clause 3 leh Clause 4-in dah CSS hnuai a thawkte ngheh dan tura a lo tih ang zulzui a kalpui tur a ni ang.
Sawrkarin nikum July ni 22-a Health Worker 100 lakna tur Advertisement a tihchhuah hi CSS hnuaia contract a thawk mek Health Worker 72 te chuan an khing a. Senior Advocate C. Lalramzauva leh Advocate Stephen Lalbuatsaiha te chu sawrkar khingtute aiawh hian an ding a, sawrkar aiawhin Government Advocate Lalnunhlui a ding thung a ni.