Fruit Beer/Juice siamchhuah dilna thehlut awm tawh
Lunglei Convention Centre-a Students' Self-Support Union (SSU) General Assembly a hmanpuina-ah Chief Minister chuan sawrkarin Industry lamah uar taka hma lak a duh thu leh Mizorama Loneitute tharchhuah behchhana Industry din theite tan phei chuan sawrkar a inhawn lehzual thu sawiin, kuthnathawka eizawngte tan thlai thar leina a hranpaa Budget-a dah a nih thu leh thlai thar lei kum hnih kalpui hnuah a thawh thumna kalpui tan a nih leh tawh thu a sawi a, chhungkaw tam takin an din chhuahpui thu leh kum khata cheng nuai 20 dawn dawn lalut te pawh an awm thu a sawi a. Handholding version 3.0-ah thil thar pakhat – thalai ramdang (foreign)-a hna thawh tumte tana loan awlsam siamsak tum a nih thu a sawi a ni.
Mizoram sawrkar chuan hmathlir fel tak leh tum bulfuk tak a nei tih Chief Minister chuan sawiin, Viksit Bharat 2047 hnuaia ram changkang (developed nation) ni tura hmalakna ah NITI Aayog Vision Document-a kum 2047-a India GDP tur target atangin Mizoram chuan ‘Vision Mizoram 2047’ a duan angin kum 2047-a India GDP 1% lo thawhchhuah ve tum a nih thu a sawi a. Viksit Bharat 2047 GDP target chu a sangin, 1% pawh chu sang tak a nih thu sawiin, tuna Mizoram State dinhmun atanga teh chuan kum 2047-a India GDP target-a 1% thawh pha tur chuan kumtin Mizoram GSDP chu 20% chung lama a thanchhoh a ngai tih a sawi a. Chumi tihlawhtling tur chuan kalphung thar tha zawk kalpui chhoh zel a nih thu sawiin, Mizoram State Project Monitoring Committee din a nih thu leh Project kal laite endik hna an thawh char char thu a sawi a. State sum leh pai a lo pun theih nan Resource Mobilisation Committee din a nih thu leh uluk taka zir chungin sawrkar sum leh pai renchem theihna lai te, chhiah tam zawk hmuh theihna tur te, chhiah awl rute dapchhuahna turte an duang tih a sawi a. Chhiah chu State sum hnar a nih avangin mipuite pawhin kan pek tur chhiah hi chu tha taka kan pek a tul tih a sawi bawk.
Viksit Mizoram a thlen theihna tura hna thawktu pawimawh ber turte chu Vawiin-a thalai kum 10 leh kum 29 inkarte hi an nih thu Chief Minister chuan sawiin, tuna sawrkarin ruahmanna hrang hrang a neihte chu thalaite tinzawn a nih thu leh thalaite tan hun rangkachak a nih thu a sawi a. Thalaite chu sawrkarin an tana remchang a siamsakte chhawr tangkai a, an kalna kawng tur uluk taka thlang tur leh eng kawngah pawh kal se, hlawhtling ngei tura theihtawp chhuah turin a chah a. Ruihhlo in a tihbuai loh, mahni kea din tum zirlai naupang thahnem tak an awm chu lawmawm a tih thu leh a thla an tihmuan thu a sawi bawk.