Edn. Minister in tlangzarh

School Education Minister Dr. Vanlalthlana chuan nimin khan Aizawl Khatla-a Bible House-ah zirna lam hawi lehkhabu thar ‘Development and the Tribal Question in India’ tih a tlangzarh. He hunah hian Minister Dr. Vanlalthlana chuan ram hmasawnna leh industry siam chhuanlama Tribal te ram laksak an nih thin thu sawiin, tuikhuah lian te, lungalhthei laihchhuahna leh factory siam nan te hman a nih avangin mipui tam takin an dikna chanvo an hloh phah thin tih a sawi a. Hei hian hnam zia leh nihna hloh theihna dinhmun hlauhawmah min dintir thin a ni, a ti. Dr. Vanlalthlana chuan Academicians leh Researcher-te chu sawrkar thiltih dem ngawt lova, zirna huangah leh thil dangah pawh sawrkar pui tur leh theihtawp chhuaha rawtna tha thehlut thin turin a chah a ni. Lehkhabu tlangzarh tak hi mi thiam pahnih, Prof. (Retd.) Virginius Xaxa leh Dr. Roluahpuia, Associate Professor, IIT Roorkee te tangkawp buatsaih a ni a. Lehkhabu tlangzarh a nih hnu hian a bu chhunga thu awmte hi sawiho zui nghal a ni.