Chief Minister in SSU chu Mizoram-a thalai pawl ngaihsanawm ber pawl nia a hriat thu a sawi

Chief Minister Lalduhoma chuan Students' Self-Support Union chu Mizoram-a thalai pawl ngaihsanawm ber pawl nia a hriat thu sawiin, a din chhan leh a thil tuma ding nghet tur leh Pressure Group ang maia awm lo tura chahin, an member-te thawh tur inhlawhna (part time job) an ngaihtuah thin chu chhunzawm zel turin a chah bawk.

Students' Self-Support Union (SSU) hian nimin khan Lunglei Convention Centre-ah General Assembly vawi 40-na hmangin he hun hi Chief Minister Lalduhoma chuan khuallian niin a hmanpui a, Chief Minister chuan zirlai naupang, nu leh pate thla ar hnuaia la awm rual lek ni chunga zirna kawnga mahni mamawh thawhchhuah tuma beitute intelkhawmna, Students' Self-Support Union chu Mizoram-a thalai pawl ngaihsanawm ber pawl nia a hriat thu sawiin, an pawl din chhan leh thil tum chu ropui a tih thu a sawi a. Lehkhathiam nih leh kum tam ringawt chu mi puitling nihna a ni lo tih sawiin, SSU thil tum tihhlawhtlin chu degree hlawhchhuah ruala chhawrtlak tak nih nghal theih nana thil pawimawh ber zinga mi a nih thu a sawi a. Thalaite'n zirlai nih laia sumdawnna te, kuthnathawka inhlawhna te, network market leh e-commerce te an tih hram hram chu a hlawh tam lam aiin tawnhriat tha tak an neih phahna a nihna chu a hlutna leh mi puitlinga anmahni siamtu a nih thu a sawi a ni.

Nu leh pate'n tha taka an enkawl theih reng ni chunga mi puitling zawk nih duha mahni mamawh thawhchhuah tuma bei mekte chu hlu leh chhuanawm a tih thu sawiin Chief Minister chuan, retheihna avang leh loh theih lohna avanga bei fan fante pawh Pathian in mi puitling ni tura a duhte chu awlsamna emaw, nawmsakna emaw a pe hmasa ngai lo tih hre turin a chah a. Harsa taka hna an thawh hram hram avanga inngai hnuaihnung bik lo tur leh vanduai bik riauva inngai lo tura chahin, harsatna chu anmahni tathriamtu lungtat leh tawnhriat tam tak petu atan hmang turin a chah a. SSU chu a din chhan leh a thil tuma ding nghet tur leh Pressure Group ang maia awm lo tura chahin, an member-te thawh tur inhlawhna (part time job) an ngaihtuah thin chu chhunzawm zel tur leh zirlai naupang, mahnia inchawm chunga lehkha zir, hun awl neih loh vanga SSU-a intat lut hman lo te pawh dapchhuak a, fuih a, a theih ang anga tanpui turin a chah nghal bawk a ni.

Chief Minister chuan Mizoram sawrkarin thalaite tan hmalakna a ngah thu leh thalai taimate tan Jubilee dar an vuak mek thu sawiin, sawrkar hna lak tinreng dik taka kalpuiin, a thiam thiam lak an nih thu a sawi a. Mi zawng zawng tan intluk tlang taka remchang siam vek a nih thu sawiin, sawrkar hnathawk tura sawipuitu tha ber chu thawhrimna a nih thu a sawi a. Thalai zingah sports lama talent neite dapchhuah hna kalpui mek a nih thu leh chherzui tlak nia hriatte chu Hand-holding – Empowering Mizoram Sports hmangin an Ban-ah kaih a nih tur thu sawiin, sumdawnna leh thil siam chhuah lama theihna neite tan Flagship Scheme – Bana Kaih kalpui mek a nih thu a sawi a. Thil thar hmuchhuak a, sumdawnna kalpui theite tan Bana Kaih Venture Capital Fund siam a nih thu leh Venture Capital Fund siam chu Mizoram chanchina a vawi khatna a nih thu a sawi bawk.

SSU General Assembly hi SSU General Headquarters Vice President Lalrinmawia chuan kaihruaiin SSU GHQ Adviser James Ramdinmawia kaihhruaiin Self-Support Award 2026 dawngtute chawimawina hun hman niin, Students' Self-Support Award 2026 hi Lalremruati, Lalruat-sanga leh Jessica Lalchhanchhuahi te hnenah hlan a ni bawk.

Students' Self-Support Union (SSU) hi May ni 27, 1985 khan Hrangbana College, Aizawl-ah din niin, thupui atan 'Zirna atana mahni intodelh' tih leh 'Kut hna thawh chawisan' tih an hmang a. Tun dinhmunah Mizoram chhunga zirna In hrang hrangah Branch 30 nei mekin member 25,000 vel an awm mek a ni.