Bawlhhlawh paih Motor leh MMU hlan

Lawngtlai East Bialtu MLA leh Adviser to Chief Minister Dr. Lorrain Lalpekliana Chinzah chuan nimin khan District Catalytic Intervention Plan atanga lei Public Garbage Disposal Truck (TATA 610 SK) leh Bolero Camper (4x4) chu Lai Autonomous District Council (LADC)-a Sanitation Department kutah hlanin Mobile Medical Unit (MMU) a hman tur Bolero Camper(4x4) chu District Hospital, Lawngtlai hnenah a hlan bawk a. Hemi puala inkhawm LADC Office tual-a neih ah Dr. Lorrain Lalpekliana Chinzah chuan State Sawrkarin kawng hrang hranga ram mipuiten hma an sawn theih nan theihtawp a chhuah reng thu sawiin, Lawngtlai khawpui tihhmasawnna atan District Bawrhsap Office-ah cheng nuai 100 pek a ni a, chumi atang chuan Lawngtlai khawpuiin a mamawh em em heng Motor te hi leiin hlan an nih thu a sawi a ni.

Lawngtlai Bawrhsap Donny Lalruatsanga chuan heng Motor te hi cheng nuai 43 senga lei a nih thu sawiin, kawng hrang hrangah hmalakna kalpui mek a nih thu a sawi bawk.