ASF hri leng in ziaawm lam a pan rih niin a lang
AH & Vety Department-a thawktute hnen atanga LENKAWL in thu a dawn danin kumin kumtir lam atanga Serchhip District chhung khua leh Veng hrang hranga Vawk hri, African Swine Fever (ASF) hri leng hian ziaawm lam a pan nia an hriat thu an sawi a, tunhnai ah Vawk thi leh suat chhinchhiah belh awm lovin harsatna thleng a awm hriat a nih loh thu an sawi a ni.
Kumin chhunga Serchhip District-a ASF hri leng hi Veng leh khua 21-ah hmuh ni tawhin chhungkaw 704 ten hri leng hi an tuar a, tun thleng hian ASF vanga Vawk thi 1905 awm tawhin hri leng darh zel tura venna atan Vawk 1089 suat a ni tawh bawk a, ASF vanga Vawk thi leh suat hi a vaiin 2994 a tling tawh a ni. Khaw hrang hrang zingah Thenzawl khua chu ASF hri leng tuar nasa ber niin chhungkaw 170 ten hri leng hi an tuar a, Vawk 511 thi tawhin 143 suat a ni tawh bawk a, Chhingchhip-ah chhungkaw 70 in tuarin Vawk thi 230 a awm bakah Vawk 271 suat a ni bawk.