8th Schedule chungchanga hmalakna him lo ah ngai

Joint Hnampual Students’ Organisation (JH-SO) chuan 8th Schedule chungchanga Mizoram Language Development Board (MLDB) hmalakna te chu him tawk lova ngaiin, ngaihtuah nawn leh zirchian ngei tul an tih thu an sawi.
Joint Hnampual Students’ Organisation (JHSO) hian Zirtawpni khan Office Bearers Emergency Meeting neiin hemi hnua thuchhuah siama an tarlan danin, November ni 25, 2025 khan MLDB hian hnampual zirlai pawl pasarih- Ranglong Students’ Union, Hmar Students’ Association, Pang Zirlai Pawl, Siamsin Pawl Pi, Lai Students’ Association, Mara Students’ Organisation leh Mizoram Bawm Students’ Association te chu Meeting neihpuiin, hemi tum hian heng zirlai pawlte hian 8th Schedule hi an thlawp rih loh thu an tihchian hnuah Media lamah thlawp ang a thudiklo thehdarh zuiah MLDB chu puhin, Education Minister Dr. Vanlalthlana thlengin Assembly House (Budget Session)-ah thudik tawk lo an sawitir hial chu pawi an tih thu JHSO hian an sawi a ni.

Hemi chungchang ah hian hun rei tak hmalakna a awm tawh loh hnua MLDB-in Larsap hnena hma an la thar leh chu an dem hle tih JHSO chuan sawiin, 8th Schedule chungchangah hian an dinna ngaia an din tlat dawn thu an tarlang a. MLDB-in hma an la chhunzawm zel a nih chuan, a tul dan azirin Mizoram Larsap leh Central Ministry hnen thlenga zualko hial an tum thu an sawi bawk.

Tarlan tawh angin tunhnai khan Larsap General (Rtd) Vijay Kumar Singh chuan Mizo Language Development Board (MLDB) Chairman R. Lallianzuala leh Secretary Lalsangpuia te chu Lok Bhavan-ah kawmin Mizo tawng tihhmasawn nana pawimawh hrang hrangte sawipuiin, India tawngpui, Eighth Schedule-a Mizo tawng sengluh thuai a nih theih nan theihtawp chhuahpui a tum thu a sawi a ni.