Bana Kaih hnuaiah mi 5368 ten CM Special Package dawng tawhin mi 509 te hnenah Loan pek a ni tawh
Mizoram State Policy Coordination Committee (MSPCC) Vice Chairman leh Adviser to Chief Minister Dr. KC. Lalmalsawmzauva chuan Zirtawpni kaltaa Bana Kaih thawh thumna (Handholding 3.0) tlangzarhna hunah Bana Kaih Scheme kalpui tawh chin dinhmun tlangpui tarlangin, a thawh khatna, Handholding 1.0-ah khan CM Special Package hmangin chhungkaw 2,255 te thawhpui an ni a, hemi atan hian Rs. 18,33,58,370 senral a ni a, a thawh hnihnaah CM Special package hi chhungkaw 3113 te thawhpui ni leh tawhin Rs. 15,17,45,500 sen a ni a, thawhpuina la dawng lo mi 1907 an la awm a. Heti hian a thawh khatna leh thawh hnihna hnuaia CM Special Package hmu tur hi an vaiin mi 7275 an ni.
Loan Component bikah MSPCC chuan Progress Partner tur mi 823 a thlang tawh a, an loan dil zat belhkhawm hi Rs. 1,18,57,70,195 niin dilna la chinfel loh 154 a la awm a. Heng an thlan tawhte atang hian Partner Bank ten mi 509 chu loan an pe tawh a. An loan pekchhuah tawh chin belhkhawm chu Rs. 46,37,39,450 niin MSPCC in a thlan tawh, Bank lamin Loan an la pek loh mi 314 an la awm bawk a ni.
Partner Bank zingah hian Mizoram Rural Bank (MRB) chuan Loan an pe hnem ber a, mi 328 hnenah p tawhin State Bank of India (SBI) chuan mi 108 pe tawhin pahnihna an ni a, Mizoram Cooperative Apex Bank (MCAB) chuan mi 65 an pek tawh bakah Union Bank of India in 7 leh IDBI in mi pakhat an pe tawh a. Loan hmutute tana Guarantee fee chu sawrkar chuan Bank pathumte hnenah Rs. 14,01,762 a pe tawh a, an loan interest hi Rs. 1,12,13,347 a peksak tawh bawk a. Guarantee fee leh interest te rulhsak nana sawrkar sum sen tawh chin hi Rs. 1,26,15,109 a ni a. India ramah Mizoram chauh hi interest subvention zaa za (100%) rulhsak thei awmchhun nia hriat a nih thu a tarlang bawk.
Kuminah September ni 8 thleng khan Sawhthing chingtu chhungkaw 11,655 te hnenah Support Price Rs. 50,68,35,960 pekchhuah an ni tawh a, nikum (2025) chhung khan loneitu mi 22,155 te hnenah Support Price hi Rs. 1,40,84,25,600 pekchhuah ni tawh bawkin kumin hian Khuangleng SCC chuan Sawhthing hi an hralh tam ber a, kg. 14,52,766 hralhin Cherhlun SCC-in kg 7,03,870 leh Keifang SCC-in kg 6,21,708 an hralh bawk a. Khaw hrang hrang zingah Maite khua chuan kumin hian Sawhthing hralh tam berin kg. 3,17,347 an hralh a, Hliappui-in dawtin kg. 2,95,240 an hralh bakah Cherhlun khua chuan kg. 2,88,880 an hralh bawk.
Kumin hian mimal-a Sawhthing tharchhuak tam ber chu Zoramnghaka, New West Phaileng niin kg. 26462 a thar a, Lalmalsawmi, Zion Veng, Champhai chuan dawtin kg. 22,046 a thar bakah Helen Lalrosiami, Dungtlang chuan kg 21,982 a thar bawk a ni.