ZPM Party mi leh sa te chi-ai lo turin chah

ZPM Sr. Vice President thar Dr. Kenneth Chawngliana chuan ZPM party mi leh sa te chu puh mawhna dik lo leh thu belhchian dawl lo ah lo chi-ai lo turin a chah.

Nimin-a thuthar thehdarhtute a kawmna ah ZPM Sr. Vice President thar Dr. Kenneth Chawngliana chuan tunhnaiah opposition party ten anmahni inchingfel hmasa si lovin, ZPM party chhung inrelbawlna (administration) leh a bik takin Chief Minister Lalduhoma beihna nasa takin an kalpui mek nia sawiin, “Chief Minister Pu Lalduhoma kaihhruaina hnuaia ZPM sawrkar in Zoram hmasawnna tura kawng hrang hranga a hmalakna hlawhtling chho zel hi Zoram mipuiin an hlutsak em em lai a, hetianga insawiselna lam ringawt Policy No. One-a an nei ta mai nia lang hi ZPM party chuan pawi kan ti takzet a ni,” a ti a. “Tuna an policy ni meka Zoram mipuiin party pahnih te an hriat dan chu ZPM party sawrkara Chief Minister Pu Lalduhoma beihna ringawt hi ni berin a lang a. Hetiang zawnga politics kalphung hlui chawinun leh hi an policy ni ta berin a lang,” a ti.

ZPM Sr. Vice President chuan Opposition party te chu an party chhung chingfel tura ZPM party a inrawlh lo ang bawkin, ZPM party inrelbawlnaa thu dik lo leh dawt phuahchawp hmanga Zoram mipui thlekpui an tum mek chu sim vat tura ngenin, “Hei hi Zoram mipuite duh dan pawh niin a lang,” a ti a. Thu belhchian dawl lo leh dawt hmanga party pahnih ten ZPM an beihna hian ZPM party-ah lungrualna leh tanrualna a siam zel zawk niin a sawi bawk.

Hei bakah hian ZPM Sr. Vice President chuan Zoram hmun hrang hranga ZPM party mi leh sa te hnenah ngenn siamin, “Hetiang puh mawhna dik lo leh thu belhchian dawl lo ah te hian lo chi-ai lo tur leh Social Media a tawngkam uchuak leh mi dang tana ngaihthlak nuam lo lakah fihlim turin ka ngen a ni,” a ti bawk.