MZP Assembly vawi 70-na in zirna kaihhnawih a hmalakna tur hrang hrang an rel
MZP Assembly vawi 70-na hi Darlawn-ah neih niin zanin khan a tiak a, MZP Assembly-ah hian hmalakna tur hrang hrang ngaihtuah niin Zirna kaihhnawiha hmalakna tur chi ruk (6) an rel zingah Mizoram sawrkar enkawl College hrang hrangten an mamawh Bus an neih theih nan Sawrkar-in hma la rawh se tih te; CUET, NEET leh All India Competitive Exam-ah Mizo zirlaite'n Exam Centre chungchângah harsatna an tawh thin avângin Mizoram-ah CBT Exam Centre dah belh a nih theih nan hmalak ni rawh se tih te; Zofate kan inpumkhat lehzual theih nan Sikul zirlaibu-ah Mizo hnam hrang hrangte chanchin telh a nih theih nan MZP in hma la rawh se tih te; Mizo thalai leh zirlaite tan Career Awareness Campaign leh Nationalism Campaign a tam thei ang ber MZP in buatsaih rawh se tih te; Zirlaibu-ah Mizo tawng dik tak hman anih theih nan a tul angin hmalak ni rawh se tih leh Zirlaiten ruihhlo hmansual a hlauhawmzia an hriat theih nan MZP in nasa zawkin Drugs Awareness Campaign buatsaih rawh se tih te a tel.
Ram leh hnam kaihhnawih-a hmalakna tur panga (5) an rel zingah Kaladan Multi-Modal Transit Transport Project (KMTTP)-in kan ram leh hnam tana nghawng a neih theih dan zirchiana hmalak ni rawh se tih te; Mizoram ramri dik tak humhalh a nih theih nan Sawrkarin hma la rawh se tih te; ‘The Mizo Marriage and Inheritance of Property (Amendment) Act, 2026’ khauh taka kenkawh a, hnamdang thlah ten Scheduled Tribe (ST) chanvo an chuh ve loh nan hmalak ni rawh se tih te; Mizoram luhka hmun hrang hrangah mi tupawh ILP check an nih theih nan MZP in hma la rawh se tih leh Mizo hming hawha hnamdang sumdawn tirte na taka hremna Dan Sawrkar-in siam se, a tul anga dapchhuah thin ni rawh se tih te chu a tel bawk.
MZP Assembly-ah hian nimin khan ‘Zo ze chawi Ni’ hman niin Lok Sabha MP, Richard Vanlalhmangaiha chuan khuallian niin a hmanpui a, Zirlaite thiamna leh finna petu Education chu a ngaih pawimawh ber a nih thu leh MP Fund atanga khaw 94-a School sak thatna tur a pek chhuah tawh thu sawiin, ZPM Sawrkarah zirlaite tan dik taka hnalak hrang hrang kalpui mek a nih thu leh induhsakna awm lovin a tling leh tlak ngei lak thin an nih thu a sawi a. “Mizoram chhunga zirlaite hian ramdanga hnathawh dan turte kan dap a ngai hle a, State danga kan unaute chu hmung hrang hrangah an in zar pharh nasa hle a, anmahni in theihtawp chhuahin an in hai kua a, an awhawm in an tangkai thin hle a ni” a ti. He hunah hian MZP General Hqrs. President Dr. C. Lalremruata pawhin thu a sawi bakah Assembly palai kalkhawm te'n Zo thuam a in thuam in, zai leh hnam lam hrang hrang entir a ni bawk.