Zodin Square a lirthei dahna siamna ah hman tangkai loh sum sen a tam tih sawi
.jfif)
CAG Audit Report-in a tarlan danin kum 2017 October ni 12 khan Urban Development & Poverty Alleviation (UD&PA)-in New Economic Development Programme (NEDP) sum hmanga Aizawl Zodin Square-a Multi-Level Car Parking cum Multi-Utility Centre a sakna senso atan Mizoram sawrkar chuan cheng vbc. 25 hman phalna a tichhuak a. He lirthei dahna In tur hi sak zawh hnuah pawh Robotic Car Parking System chu kum 5 leh a chanve dawn bun loh a nih avangin hemi atana senso cheng vbc. 8 leh nuai 6 zet chu hman tangkai a ni ta lova. Hei hian ruahmanna siam leh thawhhona kawngah thil felhlel tak a hring niin CAG Audit report chuan a tarlang a ni.
He hna thawh hma leh sawrkarin sum sen tur ruahman a chinfel hma kum 2016 April ni 25 khan UD&PA Department chuan Architectural design siamtu tur inelna a buatsaih a, ‘heta inelna a thiam ber chuan cheng nuai khat lawmman a la ang’ tih a ni a. He inelna a lawmman pakhatna latu hi Consultant emaw Contractor-ah emaw ruat a ni ang tih sawi tel a awm lo. Chuti chungin inelna a tel 6 zinga pakhatna dinhmun hauhtu JMT Architects, Zarkawt, Aizawl chu he hna thawk tur hian thlangin September ni 11, 2017 inremna an ziahpui ta a. Hetah hian thil hrang hrang thawk turin cheng nuai 45 senna tur inremna an ziahpui a ni.
Kum 2018 September ni 21 khan UD&PA Department chuan Tender hran chhuah lovin hnathawk mektu hi cheng vbc. 8 leh nuai 6 senga Robotic Car Parking System siam turin hna a pe leh ta a. September ni 25-ah inremna ziahfel a ni a. Hei hian kum 2010 December ni 6 leh kum 2016 September ni 8-a Finance Department Office Memorandum chhuahte a kalh a, uchuak taka Contractor duhsakna a ni tih CAG chuan a tarlang a. Robotic Car Parking System hi kum 2019 June thla-ah chah thleng tawh mah se, kum 5 chuang zet hman tangkai lohvin a awm niin CAG Audit Report chuan a sawi a ni.