Zakaria thihna ni 6 chhungin chhuichhuah a ni
Home Minister K. Sapdanga hian Inrinni khan New Builum khua tlawhin tunhnaia tualthi 9 Assam Regiment mi, Zakaria Lalhriattluanga chhungte hnenah ralna a hlan a, he hunah hian Minister hi a nupui, Darkhumi bakah Champhai South bialtu MLA Lt. Col. Clement Lalhmingthanga leh Adviser to Chief Minister TBC. Lalvenchhunga bakah Official dang ten an tawiawm a. He hunah hian Home Minister chuan he thil thleng hi pawi an tih thu leh sawrkar pawhin pawi a tih takzet thu a sawi a. Hetiang tualthihna rapthlak hi thil thleng khat tak a nih thu sawiin, Zakaria nu leh pa leh a chhungte zawng zawng chu a lainat takzet tih a sawi a. “State sawrkar aiawha ral tura rawn kal kan ni lova, Mizo kan nihna anga kan lainatna rawn lantir turin hotute nen inrawnkhawmin kan rawn kal a ni,” a ti a. Vanduaina a thlen atanga darkar 3 chhung leka misual man theih a ni chu Police-te chungah lawmthu sawiin, Dan pangngaia Chargesheet thehluh nan ni 90 phut ni thin mah se, an inpeihfel thawkhat tawh tih a sawi a, “Misualte hian an thiltih sual mil ngei hremna hmuh an phu a ni,” a ti bawk.
Mi kut tuara Zakaria Lalhriatluanga a boral hi Mizoram Sawrkar chuan pawi tiin a ngai thutak hle a. Mizoram Police te chuan he thil thleng chungchangah hian rang taka hma la zui nghalin a thattu nia puh mi 8 te chu September 230, 2026 khan man nghal an ni a. Kawnpui Police Station ah tualthah thubuai (Bharatiya Nyaya Sahita section 103(1)/115(2)/3(5)) ziahluh nghal a ni a. Zakaria Lalhriattluanga thattu nia puh mi 8 zinga puitling 6 te chu September 21, 2026 khan Kolasib Disrict Prison & Correctional Home-ah dahluh nghal an ni a, kum tlinglo mi 2 te pawh Observation Home, Thingdawl-ah dahluh nghal an ni bawk a. Heng mite bakah hian thilsual titu a puh midang pakhat chu September 23 khan man belh leh in hemi ni vek hian Prison & Correctional Home, Kolasib-ah dah luh leh nghal a ni bawk.
He hunah hian Minister tawiawmtu leh All Mizo Ex-Service League President ni bawk, Lt. Col. Clement Lalhmingthanga chuan Zakaria chu ram leh hnam tana inpe, active service lai a ni tih sawiin, Ram leh hnam tana a inpek ang chiahin, a thianpa nun chhan nan thian chhan thih ngamin a nun a hlan chu chawimawi tlak a nih thu a sawi. Hetiang taka rangin Home Department-in case an chhuichhuak chu lawmawm a tih thu a sawi a. Zakaria pa pawhin a fapa chu chhungkaw innghahna ber a nih thu leh ni 6 chhunga case chhuichhuah a ni chu lawmawm a tih thu sawiin, a fapa thihna ah hian rorelna dik tak an phut thu a sawi bawk.