State leh UT 19-ah PM-JANMAN kalpui mek a ni

Prime Minister Narendra Modi-a'n November ni 23, 2023-a a tlangzarh Pradhan Mantri Janjati Adivasi Nyaya Maha Abhiyan (PM JANMAN) hnuaiah State 18 leh Union Territory 1-a Eng (electric) la nei lo chhungkaw nuai khat te tan Solar Power Scheme-ah cheng vbc. 515 pek a ni tawh a; In sak sak tura ruahman 4,70,000 atangin 2,50,000 vel sak zawh a ni tawh bawk.
PM-JANMAN hi India ram chhunga tribal-te zinga a hnufual bik, Particularly Vulnerable Tribal Groups (PVTG)-te chhawmdawlna tura ruahman a ni a; State 18 — Andhra Pradesh, Bihar, Chhattisgarh, Gujarat, Jharkhand, Karnataka, Kerala, Madhya Pradesh, Maharashtra, Manipur, Odisha, Rajasthan, Tamil Nadu, Telangana, Tripura, Uttar Pradesh, Uttarakhand leh West Bengal bakah Union Territory pakhat - Andaman & Nicobar Islands-ah te kalpui a ni a; heng State leh UT 19-ah hian PVTG 75 an awm a ni.

Mizorama sawrkar laipui scheme te khaikhawmtu Planning Department hotute chuan Akashvani News Aizawl zawhna chhangin, PM-JANMAN hi Tribal zinga a hnufual bikte hamthatna tura duan a nih thu an sawi a; Mizoram chu Tribal State ni mah ila, PM-JANMAN in a thlûr bik Tribal hnufualte aia Mizoram khawsak phung a changkan zawk avangin kalpui a ni ve lo tih an sawi a, PVGT thlanchhuah te chu an hnufual hle a, sawrkarin an tana hamthatna a buatsaihte ngaihsak nachang hre lote leh an awmnaa kalchilha va tihsak vek ngaite an nih thu an sawi a ni.

PM-JANMAN kalpuina PVGT 75-ah hian Electric la nei lo chhungkaw nuai khat ten êng an neih ve theih nan sawrkar laipui chuan cheng vbc. 515 a ruahman a; heng PVGT 75-ah hian chenna In nei mumal lote tan In sak sak tur 4,73,939 ruahman niin heng zinga 2,50,000 vel hi sak zawh a ni tawh bawk.