Serchhip tleirawl in Badminton-ah record thar a siam
September 18 atanga 21 chhunga Lucknow-a khelh ‘Yonex-Sunrise Dr Akhilesh Das Gupta Memorial All India Senior Ranking Badminton Tournament 2026’ ah Serchhip Bazar Veng-a cheng Lalrempuii d/o Albert Lalrosanga (L) hi hi Vansh Dev (Delhi) nen tangdunin Mixed Doubles Category-ah Bronze Medal an la a, he inelna ah hian Qualifying round atanga tan in, Match thum an khelh hnuah Main Draw an in vaw kai a. Main Draw-a an match hmasa ber, Round of 32-ah Seeded No 2 Aman Farogh Sanjay leh Sonali Mirkhelkar-te inkawp chu hnehin Round of 16 ah Soham Phatak leh Siya Singh-te tangdun chu an hneh leh a. Quarter Final-ah Seeded No. 7, Aaryan Sapiah leh Pranavi Natarajan-te tangdun hnehin Semi Final-ah a vanduai zawkah an tang a, heti chung hian Mizo hmeichhe zingah Rempuii hian Senior Level Badminton inelna (National Ranking Tournament Level)-a Semi Final khel thei hmasa ber record a siam a. Pathumna an nih tak avang hian Mizo hmeichhe zingah Senior Level Badminton inelna-a Medal la hmasa ber record a siam ta bawk a ni.
Rempuii hi Tata Trusts, NEIDA, PGBA, MSSC leh MBA te thawhhona, Mizoram Badminton Initiative atanga Badminton khelh zir tan niin Regional Development Centre, Serchhip-ah bul a tan a. Chuta tangin Pullela Gopichand Badminton Academy, Hyderabad-ah insawn lehin, tunah hian National Centre of Excellence, Guwahati-ah a awm mek a ni.
Sports Minister Lalnghinglova Hmar chuan Rempuii hi Social Media kaltlanga lawmpuina hlanin, Mizoram hming tithatu Rempuii a lawmpuiin a chhuang takzet tih a sawi a, midang cho phurtu a nih ngei a rin thu leh hlawhtlinna sâng zawk chang zel turin duhsakna a hlan thu a tarlang a ni.