Ruihhlo laka fihlim hmasa ber khua ah Tlangmawi puang
Kum 2026-2029 chhunga ruihhlo do beihpui thlakna tura ruahmanna 'State Action Plan to Combat Drug Menace 2026-2029' tlang-zarhna hun niminpiah-a Aizawl-a neih ah Home Minister K. Sapdanga chuan Tlangmawi khua hi Mizoram-a ruihhlo laka fihlim hmasa ber khua ah puangin khawtlang hruaitute hnenah thuziak a hlan a, Ruihhlo laka fihlim ni tura Tlangmawi khaw mipuite tanrualna leh huaisenna fakawm a tih thu sawiin, “Ram pum tan thuchah ropui tak, ruihhlo laka zalenna an puanga, midang tana chona thianghlim tak an rawn chhawp chhuak a ni,” a ti. Thalaite chu an hmalam hun ruihhlo in a tihchhiat loh nana intiam thar leh theuh tura ngenin, Nu leh pate pawh fate ngaihven tura chahin, NGO, khawtlang hruaitu leh kohhran hotute ruihhlo do kawnga lungrual taka tanrual puiah a sawm nghal bawk a ni.
He hunah hian Larsap General (Dr) Vijay Kumar Singh pawhin Mizorama ruihhlo laka khaw fihlim hmasa bera puan tak Tlangmawi khaw mipuite thinlung taka a lawmpui thu leh chhuan-awm a tih thu sawiin, “Hei hian khawtlang inlungrualna leh inpekna a entir a, Mizorama pum ruihhlo laka filhim siam turin mitinin mawhphurhna kan nei a ni,” a ti bawk.
Hei bakah hian Larsap chuan Mizoram chu India ram hmun pawimawh taka awm a nih thu leh ramri thui tak nei a nih thu sawiin, India ram pum tana kawngkapui vengtu leh mawhphurhna sang tak nei kan nih avangin kan inthlahdah thiang lova, beng chhi renga kan awm a tul a. Ruihhlo tawlh avanga hlawk thut duhna kan hnualsuat angai a ni, a ti bawk a. Ruihhlo do kawnga enforcement agency hrang hrangte thahnem ngaihna fakawm a tih thu a sawi bawk.