Ruihhlo do beihpui thlakna tura ruahmanna tlangzarh
Assembly Annexe Conference Hall-a hemi puala hun hman ah hian Larsap General (Dr) Vijay Kumar Singh chuan Sawrkarin tanrualna hmanga ruihhlo do a ngaih pawimawh takzet thu sawiin, Prime Minister-in kar 100 awh tur ruihhlo do beihpui 'Nasha Mukh Bharat Sankalp Abhiyan' chu August ni 2, 2026-ah a tlangzarh thu leh India ram chu December 31, 2029-ah chuan ruihhlo hmanga sumdawnna awm lohnaa siam tum a nih thu a sawi a. Ruihhlo do dan tur ruahmanna tlangzarh tak chu khawtlang tanrualna leh inzirtirna behchhana thalaite ruihhlo laka chhanchhuahna tur a ni tih sawiin, “Tun hi a bultanna a ni a, kum 3 hnuah a rah chhuah kan hre thei dawn a, a hlawhtlin theih nan kan zavaiin lungrual taka kan thawhho a tul a ni,” a ti bawk.
Larsap chuan ramri kaltlanga ruihhlo tawlh ven beihpui thlakna 'Operation Jericho' leh ruihhlo ngaite enkawlna 'Hulhliap Short Stay Centre' hmalaknate fakawm a tih thu sawiin, District leh State Level Nasha Mukh Bharat Abhiyan leh Narco Coordination Centre (NCORD) te theihtawp chhuah zel turin a fuih bawk.
He hunah hian Home Minister K. Sapdanga pawhin thu sawiin, January-August 2026 chhungin ND&PS Act hnuaiah case 635 ziahluh a nih thu leh hemi kaihhnawiha man 930 zinga 111 te ramdang mi an nih thu sawiin, ruihhlo kaihhnawih man hlut zawng belh khawm chu cheng vbc. 846 chuang a ni tih a sawi a. Ruihhlo zuarte chungah dan anga na taka hremna lekkawh zel a tul rualin ruihhlo ngaite an thatchhuah leh theih nan dawhtheihna leh lainatna nena enkawl a tul thu a sawi bawk a. Mizoram chu ruihhlo tawlhna kawng a nih thu leh thalai tam tak ten an tawrh phah thu sawiin, Enforcement Agency, NGO leh Kohhrante nen kan zavaia kan tanrual a ngaih thu leh ruihhlo tawlhtu mai bakah a zawmpui dangte pawh chhuichhuaha tihchhiat vek a tul thu a sawi a ni.
He hunah hian Seju P. Kuruvilla, IPS, Inspector General of Police, Anti Narcotics Task Force chuan inlawmna thu sawiin, ruihhlo laka filhim khua ni tura hmalak tul leh ruihhlo do nana ruahmanna duante thlirho a ni a, DGP Sharad Agarwal pawhin thu a sawi bakah Zirthanga Pachuau, Officer-in-Charge, Zokhawthar Police Station, Champhai District-in ruihhlo do kawnga an hmalak dan te a sawi a, David Lalrinawma, Mizoram Drug Users Forum hnen atangin a tawnhriatte ngaihthlak a ni bawk a, Social Welfare Minister Lalrinpuii, Sawrkar official, khawtlang hruaitute, NGO leh Kohhran hruaitute bakah zirlaite an tel a ni.