Revenue Minister-in Chekbawk-a ram neite hnenah ‘Land Pass’ a hlan
Land Pass hlanna inkhawm Chekbawk hmuna buatsaihah Revenue Minister B. Lalchhanzova chuan Chekbawk ramah hian Inhmun Plot 1217 tihfel a ni tawh tih sawiin, la tihfel lohte pawh chak taka bawhzui zel a ni tih a sawi a. “Kum 2025 November ni 11 khan Maumual ram chinfel a nih thu a hmunah kalin kan puang a, Vawiin-ah Chekbawk ram a hmunah kalchilhin Pass fel tawhte Freezing Order hlipa kan semchhuak ta hi a lawmawm a, politics-a inbeihzui nan erawh hmang lo hram ila ka duh a ni,” a ti a. Tunkar chhung hian Ramhlun Sports Complex leh Zemabawk High School Veng ram fel lo, buaina awm reng thinna pawh chinfel a nih thu puanchhuah tum a nih thu a tarlang bawk.
Chekbawk ram hi Aizawl-a Veng lian panga – Salem, Venghnuai, Dam Veng, Thakthing leh Kulikawn Joint Village Council hnuaia awm thin a ni a, World Bank Road a tlang hnu hian Kulikawn Local Council hnuaiah a awm a. Kum 1997 khan Chekbawk ramah hian House Site Plan siam niin plot 305 a awm a, he House Site Plan siamna chuanhnuai-ah hian kum 2002-ah Extension Plan siam niin harsatna eng engemaw avangin kum 2009 khan revise a, plot size inkhuangrual lo lutukte pawh siam that a ni a. Harsatna chinfel ngai a tam avangin sawrkarin an dinhmun zirchiangin Chekbawk ram pumpui re-survey tawp mai a rel a, kum 1997, 2002 leh 2009 plan zawng zawngte bakah a ram bang la awmte nen a pumpuia resurvey neiha Plan that tur a ti a ni.
He thutlukna ang hian October ni 5, 2021 atanga September ni 30, 2022 inkar khan en that a, plan that leh vek niin hun hmasa lama Plot lo awm tawhte pawh a theih ang anga remthat nghal niin Internal Roads te pawh laih a ni a, ruahmanna mumal tak siam nghal a ni bawk a, mimal ram tura plot vek lovin mipui vantlang hman tangkai tur (public place) Green Area, Thlanmual, Bazar, School leh a dangte hmun tur pawh ruahman tel vek a ni ta bawk a ni.