Package rate a inrem theih loh vangin damdawi In thenkhatten MUHCS la zawm thei lo
Nikum 92025) April ni 1 atanga hman tan Mizoram Universal Health Care Scheme (MUHCS) hi sawrkar kum kal mekah kalpui leh niin tunah hian MUHCS 2.0 chu hman mek a ni a, tun dinhmunah MUHCS zawmtu hi Mizoram-a mimal leh Kohhran enkawl damdawi In 19 bakah Mizoram pawnah Private/Trust/Mission Hospital 52-ten an zawm tawh a. Hetihlai hian Mizoram-a mimal damdawi In thenkhatte chu tun thlengin MUHCS-ah hian an la tel lo a, heng zingah hian Aizawl-a damdawi In lian thenkhat- Trinity Hospital, Ebenezer Hospital leh Aizawl Hospital te pawh an tel a. Aizawl-a mimal damdawi In neitu thenkhatte chuan MUHCS chungchangah Mizoram sawrkar leh Private Hospital thenkhatte an la inthlunzawm loh avangin mipui an khawngaihthlak niin an lo sawi tawh a, sawrkar damdawi In chang lo, sum nei bawk si lo mi tam takte chu an awm man leh an enkawlna man chawi mang loa an admit mek thu te Zalen zawhna chhangin an lo sawi tawh bawk a ni.
Hetianga mimal enkawl damdawi In thenkhat ten MUHCS an la zawm theih loh lai hian MUHCS 1.0 aiin kumin April ni 1 atanga kalpui MUHCS 2.0 zawmtu an pung thung a, General Category-ah phei chuan a let aia tamin an pung niin a lang a. Thulakna in a tarlan danin kum kalta 2025-2026 a kalpui MUHCS 1.0 ah khan khan 20,198-in an zawm laiin kuminah chuan 49,927-in an zawm a. AB-PMJAY (Golden Card hmang) erawh a hranpa a inziahluh ngai lo a nih avangin a danglam lo a ni.
MUHCS 2.0 hnuaiah chungkaw 49,927 inziaklut an awm a, MUHCS 2.0 hnuaiah hian sawrkar hnathawk mi 35,325 inziaklut awmin, pensioner 11,928 an awm bawk a, AB-PMJAY (Golden Card) 2,22,943 hmang awm bawkin MUHCS 2.0 hi mi nuai 12 velin an hmang thei dawn nia ngaih a ni.