Mizoram sawrkar buatsaihin Chief Secretary lo ni tawh te nena inkawmhona neih a ni
Mizoram sawrkar in he hun a buatsaih ah hian Mizoram Chief Secretary lo ni tawh mi pali (4) — M. Lalmanzuala, Vanhela Pachuau, Lalnunmawia Chuaungo leh Dr. Renu Sharma te telin Chief Secretary nilai Khilli Ram Meena hoa buatsaih he programme ah hian anmahni chawimawina hun hman a nih bakah Chief Secretary damlai zingah he hun hmang tura tel thei lo mi panga - Lalkhama, F. Pahnuna, Lalfak Zuala, Haukhum Hauzel leh L.Tochhong te thuchah (message) chu Chief Secretary hian a chhiarchhuak bawk a ni.
He hun hman hi Chief Minister Lalduhoma chuan telpuiin Chief Secretary lo ni tawh ten Mizoram hmasawnna tura an ngaihtuahna, an tha leh zung nasa taka an lo sen tawh avanga chawimawina chauh ni lovin, he hun hi an tawnhriat atanga finna an lo chharchhuah tawh te hmanga tuna thawk mek Officer te fuihna leh finchhuahna hun a nih thu a sawi a. “Heng kan Chief Secretary te hian an hunlaiin hun khirh tak tak an lo paltlang tawh a; khang hunlaia thilthleng te leh tunlai chu danglam tawh mah se, sawrkar hnathawkte hnathawh chhan ‘mipui rawngbawl hna’ erawh a la danglam chuang lo a ni,” a ti.
Chief Miniter Lalduhoma chuan finna, rinawmna, mahni inthununtheihna leh taimakna te chu ram leh mipui hmasawnna atana thawktu sawrkar hnathawkte kaihruaitu tur a nih thu sawiin, “Inrelbawlna tha leh sawrkar tha nei tur chuan remruat thiamna leh taimakna piah lamah ram hmangaihna leh inpumpekna nena mipui rawngbawl a tul a ni,” a ti a. Hmasawn zel turin kawng thui tak zawh tur kan la neih thu pawh sawiin, ziak leh chhiar thiamna kawngah India ram hmahruaitu kan nihna te, khawtlang leh mipui inpumkhatna leh thawhhona tha kan neih te hian kawng hrang hranga hmasawnna tur hmabak kan neih te hlenchhuak turin nasa takin min tanpui dawn tih a sawi a. Mizoram sawrkarin hmalakna a neih mek - Handholding Scheme, Project Monitoring Committee, Resource Mobilisation Committee, E-Office, Grievance Redressal leh Digital Land Administration an kalpui mek te leh kalpui dan te he hunah hian Chief Minister Lalduhoma chuan a sawi a. Ram hmasawnna leh mipui khawsak dinhmun chawikang tura hna an thawhna kawngah theihtawp chhuah turin kalkhawm te chu a fuih bawk a ni.
He hunah hian Chief Secretary Khilli Ram Meena chuan Chief Secretary lo ni tawh te hnenah lawmthu sawiin, ram rawngbawl hna an lo thawh tawh te, chona an lo hmachhawn tawh te leh tawnhriat ngaihnawm tak tak an lo neih tawh te hmanga tuna thawk mek Officer naupang zawkten ngaihtuahna leh phurna thar nen hna an thawh theihna turin programme hi ruahman a nih thu a sawi a. He Workshop hi an hman tangkai ngei a beisei thu leh a tel zawng zawng ten rilru inhawng tak leh uluk taka ngaithlaa, Mizoram hmasawnna tura hlawkna chharchhuah tum ngei turin a chah a ni.
Inrinni-a he hun hman hi hun hnih ah then niin hun hnihna ah hian M. Lalmanzuala, Vanhela Pachuau, Lalnunmawia Chuaungo leh Dr. Renu Sharma te chuan Chief Secretary an nih laia an thil tawn te leh Officer te fuihna thu an sawi a, sawihona leh zawhna leh chhanna hun hman zui a ni a. Home Secretary Vanlalmawia leh Planning Secretary David Lalthantluanga ten Mizoram hmalakna bakah State leh District a sawrkar inrelbawlna kalpui dan te an sawii bawk a ni.