Mizoram-ah UCC hi hman ve ni rawh se - K. Hrahmo
BJP Mizoram hian nimin khan Aizawl-a an Party Office-ah karthar inhlanna leh Political Session neiin he huna thu sawitu State Core Group Member leh MLA, K. Hrahmo chuan Mizoram mipui te chuan Central-in Dan thar a introduce turah Politics thil a inbeihna atan kan hmang fo tih sawiin, “Kan hriatchian lem loh te leh kan hriatthiam vak loh vang ten Dan thar tur te kan lo hlauvin, kan insawithaih vak thin,” a ti a. Chutih laiin Dan kan duh loh, a hnu a tha leh si te hi kan nei ta nual mai tih pawh sawiin, “UCC hi Mizoram-ah hian hman ve ngei ni se tih hi Vawiin-ah hian ka sawi duh a ni,” a ti.
K. Hrahmo chuan UCC hian Tribal te min huam lo tih sawiin, “Tuna State thenkhat UCC hmang mek te pawhin an State chhunga Tribal te an huam tir lo a ni. Engvangin nge UCC chu Mizoram-ah kan hman a tulna tih hi kan ngaihtuah chian a ngai hle a, Mizoram-ah hian Non-Tribal hi engemaw zat an awm a, chung Non-Tribal awm te chuan nupui pakhat mai ni lo, pahnih pathum te an nei a, chuvangin nupui nei reng chungin Mizo hmeichhia te an rawn nei leh thin a ni,” a ti a. “Chung Mizo nupui a nei te chuan an nupui te hmang tangkaiin Sumdawnna (Business) an rawn kalpui a, an sumdawnna (Business) a tlakchhiat chuan Mizoram-a an nupui fanau te chu an chhuahsan leh mai thin a ni. UCC Dan-ah chuan mi in nupui pakhat chauh a nei thei a, chutih laiin an lo inthen palh a nih pawhin hmeichhia te tan ro insem chungchangah Dan mumal tak a awm bawk a, kan Mizo hmeichhia te Non-Tribal te laka kan ven nan he UCC hi kan hman hi a pawimawh hle a ni,” a ti bawk.