Ministry of Social Justice & Empowerment hnuaia Scheme te Mizoram-a kalpui dan thlirhona neih a ni
Social Welfare Department leh a kaihhnawih Department dangte nena hmalakna thlirhona hunah hian Union Secretary Sudhansh Pant chuan Drug dona kawnga Mizoram sawrkar leh tlawmngai pawlte hmalakna faiin, Demand Reducation-ah July thla khan Mizoram chu India ram pumah pakhatna niin he dinhmun hauh chhunzawm zel tura tan la turin a fuih a. Nasha Mukt Bharat Abhiyan (NMBA) Drug Free India Campaign chungchang sawiin, he hmalakna hi India sawrkarin a ngai pawimawh hle a; Drug nuaibo mai bakah addict ten an sim theihna tura tanpui te, enkawlna tha an dawn theihna tura tanlak te, a la ti ve ngailo ten tihchhin chakna an neih lohna tura Awareness Campaign ngawrh taka neih te chu ngaih pawimawh a nih thu a sawi a. Drug demand titawp tur leh a tawlhruk nuaibo turin Deparment hrang hrangte thawhhona a pawimawh thu sawiin, Narcotics Anonymous Booklet, Standard Operating Procedure (SOP) leh Drug Rehabilitation Centre-te accreditation chungchanga Mizoram sawrkar hmalakna a fak a. Central YMA hmalakna pawh fakin Sudhansh Pant chuan, drug dona kawnga theihtawp chhuah zel tur leh sawrkar laipui atanga sum an dawnte tangkai tak leh awmze neia an hman phawt chuan, Ministry-in a tanpui chhunzawm zel tur thu a sawi a ni.
Nasha Mukt Bharat Abhiyaan (NMBA) Drug Free India Campaign hi Mizoram District zawng zawngah kalpui niin hmalakna hrang hrang vawi 360 zet an kalpui tawh a; State, District leh Block Level-ah te Committee siamin mi 1,48,805 ten an chhawr tangkai tawh a. Addict te tan Integrated Rehabilitation Centre 10 siam a ni tawh a, District parukah De-addiction Centre a awm a, Outreach leh Drop-in Centre te siamin Aizawl leh Champhai District Hospital-ah te Addiction Treatment Facility siam a ni a. Hulhliap Short Stay hmalakna kaltlangin ruihhlo ngai 2,255 chuangin enkawlna an dawng tawh tih he hunah hian tarlan a ni.
Atal Vayo Abhyuday Yojana (AVYAY) hnuaiah kum upate enkawl dan Geriatric Caregiver training buatsaih a ni a. A thlawnin kum upa mi 613 tan Cataract Surgery, Dementia Screening vawi 181 leh Health Camp vawi 475 buatsaih sak an ni tawh a. Kum upate chenna tura sak Senior Citizens Home-ah vawiin thlengin mi 84 admit an ni tawh bawk.
SMILE kaltlangin Aizawl leh Lunglei-ah kutdawhten eizawnna tha zawk an neih theih dan kawhhmuh leh tanpui kawngah hmalak a ni a. PM-AJAY hnuaiah Scheduled Caste hmeichhiate tan Falkawn, Muallungthu leh Lunglei-ah Hostel sak mek niin tun sawrkar kumah peihfel beisei a ni a. Sanitation Worker mi 108 te Ayushman Bharat Card pek niin District zawng zawngah Emergency Response Sanitation Unit leh Responsible Sanitation Authority din a ni bawk.