Lalnunmawii hnenah ‘National Teachers' Award 2026’ hlan a ni
Kumin hian National Teachers Award hi State 27, UT leh Central Govt. Organisation 6 atanga zirtirtu thlanchhuah mi 48 in an dawng a, President Droupadi Murmu-i hian New Delhi-a Vigyan Bhawan-ah chawimawina hi a hlan a, Award hian Certificate, Silver Medal leh pawisafai Rs. 50,000/- a keng tel a ni.
Govt. Electric Veng H/S Lunglei-a Headmistress nilai Lalnunmawii hi LH. Lianzama nupui niin Lunglei Electric veng-ah an khawsak mek a, thiamna lamah B.Sc (Mathematics) niin School leh zirlaite hmasawnna turin kawng hrang hrangah theihtawp a chhuah thin a. Zirna piah lamah infiamna leh inelna hrang hrangah zirlaite fuihin Cleanliness, Free Garbage, No Smoking Zone, Eco Club te a kalpui a. Central sawrkarin a buatsaih Kala Utsav leh Children Science Congress-ah te Mizoram aiawhin National Level thlengin zirlaite a hruai tawh thin a ni.
Govenor Gen. (Retd) VK Singh a chuan Lalnunmawii chu a lawmpui thu sawiin, Mizoram in a thawhrimna chu a chhuang hle tih a sawi a, Chief Minister Lalduhoma pawhin Lalnunmawii a lawmpui thu sawiin, “Mi thiam tak tak lo chherchhuak tawh thin, naupangten an zirna piah lama an mamawh dang chena ngaihtuahsak a, tanpui peih zel mi, zirtirtu entawntlak, rawngbawlna a ni tih hre chunga hna thawk thin a ni,” tiin chawimawina hi a phu hliah hliah tih a sawi bawk a. Education Minister Dr. Vanlalthlana pawhin a lawmpui thu a sawi bawk a ni.