Insit hle mah ila kil tinah hian Pathian ram hi a thleng mek zel a ni - Lalduhoma
Zoram People's Movement (ZPM) chuan nimin khan Aizawl-a Vanapa Hall-ah General Assembly Vawi 2-na neiin he hunah hian ZPM President thar leh Chief Minister Lalduhoma chuan 'Ram rorelnaa Pathian ram tundin' tih thupui-a nei an ni tih sawiin, “Candidate kan nih lai atangin 'Ka eiru lo ang' tiin bul kan tan a. Kan sawrkar tirh atangin kan rama Pathian ram a lo thlen theih nan hma kan la nghal a ni,” a ti a. ZPM sawrkarna hnuaia Pathian ram a lo thlen chhoh mek dan hrang hrang sawiin, “ZPM Sawrkarah chuan sawrkar hna lakah dik taka tih niin, Advertisement kaltlang loa hna lak a awm lo. Work Order pek loha hna thawh pakhatmah a awm lo a. Buhfai buk a dik tawh a, Revenue hnuaia ram fel fai lo chinfel mek zel niin, dik lova pension la mi tam takin an PPO an rawn surrender mek. Hlemhletna tih bo a ni mek. Ram hruatuten eirukna tih bo chungchangah hian hma kan hruai hmasa a. Intiamna nen bul kan tan a. Kan sawrkar atanga ni 20-na ah tunhmaa la awm ngai lo, CBI hnenah General Consent kan pe nghal a ni,” a ti.
Heng baka Mizoram State Project Monitoring Committee din niin anni hian hna thawh hrang hrang endik hna an thawk tih Chief Minister chuan sawi bawkin, “LSC lem pekchhuah pakhat mah a awm tawh lo. Ration Card siam that niin buhfai buk a dik tawh. Kuhva Smuggling tihtawp a ni. Ruihhlo dona kawngah India ramah Mizoram hi pakhatna kan ni,” a ti a. “He ram kan then thianghlimnaah hian Setana lamtang hi kan dim vak dawn lo. Tun thlengin kan Minister leh MLA zingah eiruknaa hminghliauna nei kan la awm lo. Chutiang lo ti kan awm a nih chuan a finfiahna nen min rawn bei rawh se. Kan ti dik lo a nih chuan Jail-ah pawh kan tang mai tur a ni,” a ti a. “He ram hruai hna kan thawhnaah hian insit hle mah ila kil tinah hian Pathian ram hi a thleng mek zel a ni,” Chief Minister chuan a ti bawk.
Nimin-a ZPM Assembly hi Sr. Vice President, Dr. Kenneth Chawngliana chuan kaihruaiin Secretary General, PB Lalsawmliana chuan hruaitu thar inhmelhriattirna hun a hmang a, General Secretary (GAD) Eddy Zosangliana Colney bakah Chakma Autonomous District Headquarters, Lai Autonomous District Headquarters, Mara Autonomous District Headquarters leh Southern Headquarters atangin report ngaihthlak a ni a, Resolution pathum pass nghal a ni a. ZPM Vice President Lalmuanpuia Punte chuan lawmthu sawiin hun tawp a khar a ni.
ZPM GENERAL ASSEMBLY RESOLUTION :
1. Zoram mipui ten Mizoram enkawl tura mawhphurhna min pek angin, ZPM chuan kum hnih leh thla riat lai rorelna kan lo chelh ve ta a. Zoram mipuiin min tawiawmnaah te, min tawngtaipuinaah te, min fuihna leh zilhna zawng zawngah lawmthu kan sawi a. Mizoram leh Zofate tan a tha ber kan duh a, chutianga rorelna kan kalpui zel theih nan min tawngtaipui a, min tawiawm zel turin Zoram mipui te kan sawm a che u.
2. Party roreltu sang, Executive Committee-in a rel ang a, ZPM party hruaitu tur tha tak tak Val Upa Council (VUC) in min ruatsak hi kan lawm hle a. Pu Lalduhoma kaihruaina hnuaiah chak taka ram hmasawnna kawng zawh zel turin theihtawp kan chhuah zel dawn a. Kum 2028 inthlanpuiah pawh a hovin sawrkar siam leh ngei kan inbeisei.
3. ZPM auhla pui ber, flagship program thlai thar lei leh Banakaih policy te tluang taka kalpui a ni hi lawmawm kan ti a. Chief Minister Pu Lalduhoma leh a thawhpuite thawhrimna leh thahnemngaihna zarah hlemhletna (corruption) tawmimna State kan ni chho ta mek te hi ropui kan ti a. Mizoram tha zawk din tura thawhho puiah Zoram mipuite kan sawm a che u.