District Council pathum-a CEM te inhmukhawm
Lawngtlai-a Lai Autonomous District Council (LADC) CEM Confernce Hall-ah inhmuhkhawm ah hian Lai Autonomous District Council (LADC)-a CEM C. Lalsawmzuala, Mara Autonomous District Council (MADC)-a CEM M. Laikaw leh Chakma Autonomous District Council (CADC)-a CEM Nirupam Chakma te bakah anmahni tawi-awmtute an tel a, LADC a Chairman C. Lalmuanthanga pawh he inkawmna ah hian a tel a ni.
He thutkhawm a tel te hian Sawrkar laipui-ah Special Development Fund dil tha an ti a, State Sawrkar atangin Revised Estimate an hmuh theihloh avangin bawhzui turin ADC pathum ten a huhovin Chief Minister leh Governor hmuh tha an ti a, Elementary School chinah Samagra chu District Council kutah dah nise an tih bakah hmun kilkhawr zawk ami te dawmkan nana Sawrkar laipui ruahmanna, Vibrant Villages Programme-II (VVP-II) pawh Autonomous District Council huamchhung ami chu ADC te kutah dah a nih theih nan thuneitute ngen tha an ti bawk.
Mizoram Sawrkar leh District Council ten Compensation Award atanga Administrative Cost an insem dan, State Sawrkarin zaa 70 leh District Council-in zaa 30 an chan thin chu District Council in zaa 80, Mizoram Sawrkar (DC) in zaa 20 chang turin hmalak an remti a, Lai, Mara leh Chakma Autonomous District Council te'n Kut (Festival) an neihna ah Cultural Troupe tirh tawn bakah Elected Office holder pakhat theuh in-Palai tawn thin nise an ti bawk.
He thutkhawm-ah hian Lai, Mara leh Chakma Autonomous District Council te chuan inpumkhatna tha zawk neia thawhho zel tha an ti a, Sawrkar Laipui leh State Sawrkar nena thawkhova, Sixth Schedule in thuneihna a pek hmanga hmasawnna ruhrel siam zel an tum thu an sawi bawk a. Autonomous District Council pathum ten rualkhai zawka ke an pen theih nan hmalakna ah sulsutu turin Chairman-ah M. Laikaw, MADC CEM; Vice Chairman-ah Nirupam Chakma, CADC CEM leh Secretary-ah Sanghuliana Mualchin, LADC Dy. CEM, te an ruat nghal bawk.