Bualpui khuaa mi kut tura a boral nia hriat vuiliam a ni
Niminpiah tlai khan Kolasib District-a New Builum khaw mi Zakaria Lalhriattluanga (29) chu Bualpui-ah hian mi kut tuar ni ngeia hriat in a boral a, Zakaria hi Assam Regiment tanglai niin niminpiah khan chawlh hmang turin Mizoram-ah a lo haw a, Lengpui atangin a thianpa lirthei-a hawin Bualpui-ah hian lirthei dang nen intawkin lirthei khalhtu ve ve chu an inhnial a. Hetia an ding hi mi thenkhat Picnic haw lam, Bolero Pickup-a chuangte chuan kut rawn thlakin an insual buaina ah Zakaria hian nunna a chan a, kutthlak tute hi an tlanchhe nghal a ni.
He thil thlenna hmun hi Police te chuan pan nghalin Zakaria ruang hi Police leh Forensic lam ten an enfiah hnuah nizan hmasa khan an khua New Builum-ah lak niin nimin khan Kolasib District Hospital-ah Postmortem a ni a, hemi hnu hian Sipai chawimawina famkim nen vuiliam a ni.
Police te chuan he pawikhawihna thleng hi a \ul anga chhui zui nghalin Kawnpui Police Station-ah thubuai ziahluh a ni a, pwikhawihtute hi zawnchhuah tuma hma la nghalin mi 9 zet chu thu zawhfiah tur hian an la a, heng mite hi nimin khan Court-ah hruaiin mipa panga leh Hmeichhia pakhat chu Lung In-ah dah niin midang pahnih erawh kum tling lo an nih avangin JJB kutah hlan an ni a, an vai hian Kawnpui Hmar Veng ami vek an ni.
Mizoram Ex-Services League General Headquarters Aizawl chuan thuchhuah siamin Assam Regiment Zakaria Lalhriattluanga thihna chu na takin an dem tih sawiin, hetianga Mizoram chhunga insual rawnna a thleng fo hi hriatthiam har an tih thu leh Zakaria kutthlaktute hi arang thei ang bera man chhuaka, an phu tawk hremna pek an nih theihnan hmalak an duh thu an tarlang a. A kalsan tak a nupui leh a fate an tawrhpui takzet tih an tarlang bawk a ni.