BEIHRUAL THLA

A bul tan dan : Kum 1906 leh 1913-a Harhna a lo thlen khan Kohhran kan pung nasa hle. Amaherawhchu Harhna a lo thleng leh ta mai lo a. Kohhran a lo ngui leh ta a, rinna kawngah an la ngheh miau loh avangin khawvel lamah an kir leh ta teuh a ni. Rinawm taka awm hram hramte chuan ringtute intihchak nan leh ringlote beih nan beihpui thlak an duh ta a ni.

Beihrual neih a ni ta: Khatih hun lai khan Khasi Synod hnuaiah awmin, Mizoram hmar lam Kohhran hi Presbytery pakhat kan ni a. March thlaa inkhawmpui chuan Beihrual nei turin a rel ta a, June 1918-ah Beihrual chu hman a lo ni ta a ni. He Beihrual avang hian Kohhrana hming pe lut thar chu 344 lai an ni a. A hlawkna an hmuh avangin October thlaa Inkhawmpui chuan kum thar lamah pawh chhunzawm leh turin a rel a, September 1919-ah Beihrual nei leh turin a rel ta a ni.

A hun : Beihrual hmasa ber chu June 1918-ah neih a ni a. Kum 1919 leh 1920-ah September thlaah neiin, kum 1921-ah January thlaah; Kum 1922, 1923 leh 1924-ah te April thlaah an nei leh a. Tuna kan hman hun September thla hi kum 1925 atangin a hun nghet atan hman a lo ni ta a ni.

Thupui : Thupui hi kum 1937 atanga neih tan a ni a, kum 1981 atangin Hapta hmasa ber hi ‘Ramthar Hapta’ atana hman a ni a. kum 1983 atangin Hapta hnuhnung ber hi ‘Kristian Chhungkaw Hapta’ atan hman a ni thung. Chawlhkar tluana hman theih loh a nih chuan chawlhkhar hnuhnung ber dawttu-ah hman thin a ni.

Hman dan tihdanglam : Synod 2001-ah Beihrual hman dan tihdanglam rawtna a lut a. Chu chu pawmin SEC bawhzui atan tih a ni a. SEC chuan ruahmanna hrang hrang, point 5 emaw vel a siam ta a. September thlaa hman zelte, Tualchhung Kohhranin tha an tih angin Biak In leh In lama hman pawlh te, mahni Kohhran tan tangkai leh sawt zawka hmang duhte tan zau zawka zalenna pek a lo ni ta a ni.

Kum 2001 hmalam kha chuan inkaihhruaina siam angin Biak In-ah hman a ni mai thin a. Hman dan phung tihdanglam a nih tak hnuah hian Kohhran thenkhat chuan Upa Bial-a hun hmante, Camping, Crusade bakah Kohhran hnuaia peng hrang hrangte anmahni Inkhawm huna thupui zir ve mai tura tihte in hun an hmang ta thin a ni.   - Synfo