Serchhip Leivung paihna atan hmun pathum enfiah a ni
Serchhip Bawrhsap Paul L. Khuma hova kar kaltaa sawrkar mi pawimawh hrang hrang thukhawm in tun dinhmuna Serchhip Town Area-a leivung paihna awmchhun, Truck Owners Association te enkawl Serchhip By-pass road Lei (bridge) bula mi chu environment tana him lo tih hriat a nih avanga hmun dang remchang zawk zawng tura Survey Team an din angin nimin khan Survey Team hi an Leader DRDO Project Director Dr. Malsawmtluanga Fanchun hovin an fehchhuak a, Survey Team te chuan leivung paihna hmun atan hian hmun pathum - Khawtetlang thlang By-pass Road, Kikawn atanga Km 3.3 a hla ami te, Serchhip Chhim Veng By-pass Road, Sailiam kawn atanga Km 2.3 ami te leh Keitum Spoil Bank, luikawr hnaih lo lai ami te chu Spoil Bank thar atan hian an thlang (recommend) a, a tul anga hmalak zui a ni ang.
Serchhip khawpui tana leivung paihna tur hmun ngaihtuah tura din Survey Team-ah hian DC Office aiawh te, Revenue, PWD, NHIDCL aiawhte leh khawtlang hruaitu VC leh YMA hruaitute telin DIPR Serchhip leh FMC ten nimin-a an Survey-ah hian an tawiawm a, Survey Team-te hi August 14, 2026 hmain leivung paihna tur hmun thar tha zawkte thlithlai a, loneitute leh kan chhehvel (environment) tana nghawng tha lo nei lo tur hmunte ngaihtuah tura tih an ni.