Mizoram-ah COVID-19 hri kai pung chho leh
Health & Family Welfare Department hnuaia Integrated Disease Surveillance Programme (IDSP) a thawkte chuan tunhnai-ah COVID-19 hri kai an tam chho leh tawh tih sawiin, tun dinhmunah hian Covid-19 hri kai enkawl hi 12 an awm mek a. Kar kalta Thawhlehni khan COVID-19 hri kai enkawl hi mi 5 an nih laiin Thawhlehni khan hri kai leh kai lo endik mi 7 zinga 4 chuan an kai thar tih hmuhchhuah a ni a. Zirtawpni khan mi 10 endik zinga 7 chuan COVID-19 hri an kai tih hmuhchhuah belh leh niin Inrinni khan mi 11 endik zingah hri kai hmuhchhuah pakhat a awm leh bawk a ni.
Kumin May thla hnu, tunhnai a COVID-19 hri kai rawn awm chhoh leh tan hi August ni 4 atang khan a intan a. Hemi ni hian COVID-19 hri kai nia inringhlel mi 32 inentir zinga mi 3 chuan hri an kai tih hmuhchhuah niin enkawl zui an ni. Hemi hnu August ni 7 khan hri kai nia inringhlel mi 24 chuan an Sample an endiktir a, an zinga mi 6-te chuan hri an kai tih hmuhchhuah a ni leh a. Hemi ni hian hri kai enkawl mek hi 9 an tling chho a ni. A tuk August ni 8 khan inringhlel mi 16 endik zinga mi 5 chuan hri an kai tih hmuhchhuah leh niin hri kai enkawl hi an la awm chho ta zel a, dinhmun ngaihtuahawm erawh an awm hriat a ni lo. Heng COVID-19 hri kai hmuhchhuah te hi Aizawl District-a hri kai hmuh te an ni a, District dangah chuan Sample enfiah hi a awm lem lo a ni.