Chief Minister in Law College-ah hun a hmanpui

Government Mizoram Law College Student Bar Council chuan nimin khan zirlai pass chhuak te thlahna leh a lut tharte lawmna hun hmangin he hun hi Law Department changtu Chief Minister Lalduhoma chuan a hmanpui a ni.
Nimin-a he hun hman ah hian Chief Minister Lalduhoma chuan khawvel a changkang zel a, mi tinin kan dikna chanvo kan ngaihlu tial tial tih sawiin, “Dan hmanga rorelna (rule of law) a lo pawimawh tial tial a. Dan lam thiamte kan mamawhna a pung zel a ni,” a ti a. Law behchhana hnathawktute chu mimal zalenna te, rorelna dik leh mipui sawrkarna, kan ram kalphung lian pathum insuihfinna laia hnathawktute an ni tih sawiin, “Dan sawifiahtu an ni ringawt lova, ram Danpui humhimtu, khua leh tuite dikna vengtu leh rorelna dik chelh dingtute an ni. Chuvangin, Law Graduate tan hnathawh theih a tam a ni,” a ti.

Zirlai chhuak turte chu an Degree ni lovin an hnathawh atang zawkin an teh dawn tih pawh Chief Minister chuan sawiin, “Taima taka in inzir zui zel a ngai a, in nun pawh in uluk a tul a ni,” a ti a. Zirlai lut tharte pawh hlawhtling taka zirchhuak turin duhsakna a hlan bawk a. Mizoram sawrkar Law Department hnathawh dan tlangpui a sawi bakah Law graduate-te tana sawrkara luh theihna hnate a sawi a, Dan hrilhfiahna lama fimkhur a ngaih thu leh Mizoram leh hnam venhimna dan pawimawh zualte a tarlang bawk.

Nimin-a he hun hmanna ah hian Student Bar Council chuan Chief Minister hi College Bus an lo dil a, an hman lai chu kum 2005 a mi a nih tawh thu sawiin, Chief Minister hian pek a tum thu a hrilh nghal a ni. Government Mizoram Law College Principal Dr. Esther L. Chhangte pawhin he hunah hian thu a sawi a, an College-ah hian zirlai 180 leh Teaching Faculty 11 an awm thu a tarlang a. Teaching leh Non-Teaching faculty zawng zawng hi hmeichhia vek an ni.