Chawngte-ah ‘Chakma Black Day’ hmang

Chakma Autonomous District Council (CADC) hmunpui Chawngte-ah nimin khan ‘Chakma Black Day’ hman a ni a, he ni hi India ram thendarh anih avanga East Pakistan-ah Chittagong Hill Tracts a awm tak avanga an tawrhna hriatrengna ni atana buatsaih a ni.
He ni hi Chakma National Council of India (CNCI) Mizoram State Committee, Central Young Chakma Association, Central Mizoram Chakma Students’ Union leh Chakma Mahila Samiti te tangho buatsaih-a hman niin CADC Chief Executive Member (CEM) Nirupam Chakma chuan a hmanpui a. He huna thusawitu hrang hrang chuan India in zalenna a hmuh chhoh vela thilthleng chanchin sawiin, Chittagong Hill Tracts a cheng, a ram mi te chuan India a beh an inring vek a, kum 1947 August ni 15-ah Rangamati-ah India Hnam Puanzar an zar nghe nghe a, amaherawhchu a hnu lawk August ni 17-ah Radcliffe Award puan niin hetah hian Pakistan lamah Chittagong Hill Tracts chu behtir a ni tih puan a ni ta a, hei hi helai hmuna chengte tan chuan hun thim ber lai a ni, an ti.

Hetihlai hian India rama Chakma hnam hruaitute chuan Bangladesh-a Chittagong Hill Tracts chu India a behtir an duh thu International Court of Justice (ICJ)-ah thlen an tum tih an sawi a. Kum 1947 August ni 15 khan Chittagong Hill Tracts-ah India hnam puanzar pawhpharh a zar a ni a. Chuti chung chuan Bengal Boundary Commission chuan India ramah rin lut lovin August ni 17-ah East Pakistan ramah a dah tih sawiin, hetianga dan leh mipui duhdan kalha thutlukna siam a ni hi dodalin Chittagong Hill Tracts chu India rama rin luh a nih theihna atan thlen an tum ta a ni.