CCM huaihawtin Aizawl-ah FCRA duhlohna lantirna kawngzawh neih a ni
Mizoram-a Kohhran hrang hrang 9 te telna Council of Churches in Mizoram (CCM) bultuma Foreign Contribution (Regulation) Act (FCRA) Amendment Bill, 2026 duh loh lantirna atana Aizawl khawpui chhunga kawngzawh hi chawhma dar 10:30-ah Zarkawt leh Sikulpuikawn atanga neiin Aizawl Vanapa Hall kawt-ah an intawkkhawm a, hetah hian CCM Treasurer Upa R. Lalmalsawma kaihhruaiin inkhawm tawi neih a ni a, kawngzawh-a tel te hian tawngtai rualna hun hmangin, ‘Bungrua inchhuhsak theihna Dan thar siam hi sut leh rawh se,’ tih te; ‘Sakhaw zalenna dan kan neih lai kalh zawnga Dan siam hi tha kan ti lo’ tih bakah ‘FCRA Amendment Bill hi a nih ang ang hian pawm chiah an ngai lo’ tiin an aurual a, thuziak chi hrang hrang an keng bawk a ni.
He hunah hian CCM President Rev. Dr. R. Lalbiakliana chuan India sawrkar chuan FCRA Amendment Bill chu dik leh langtlang taka ram himna tura dan siam a nih thu leh Kristiante tinzawna siam a nih loh thu sawi mah se, ngun taka en chuan he Dan thar hnuaiah hian Kristiante leh Minority-te awh ngei ngeina tur dan hlauhawm tak a inphum niin a sawi a. FCRA Amendment Bill 2026 hi a nih ang anga pass a nih chuan Kohhran leh NGO-te bungrua leh hmunhma te chhuhsak theih an nih dawn thu sawiin, “India Danpui Article 300A-in mi tin hnenah bungrua neih leh kawl theihna pek a nih laiin, FCRA Amendment Bill hian chu chu a kalh tlat avangin kan dodal tlat a ni,” a ti bawk.
Council of Churches in Mizoram (CCM) hruaitute chuan FCRA Dan thar chuan thatna lai nei mah se, a phenah thil tha lo inphum a awm thu pawh sawiin, Sakhaw zalenna nen a in kalh tih an sawi a. He Dan hmanga bungrua inchhuhsak theihna chu tha an tih loh thu an sawi bawk.
Nimin-a FCRA Bill duhlohna kawng-zawh hi Mizoram-a Political party hrang hrangte pawhin an thlawp thu leh CCM hmalakna an thlawp thu te an sawi bawk a ni.