ASF hri leng avangin Vawk thi leh suat tam tawh

Serchhip District-ah ASF avanga Vawk thi leh suat la awm belh zelin kumin chhungin Vawk 2900 dawn chu Vawkvulhtu ten an chan tawh a ni.
AH&Vety Department ten an chhinchhiah danin nimin khan Serchhip District-ah ASF vanga Vawk thi 14 chhinchhiah belh leh niin heng te hi Thenzawl leh Hmuntha-ah 7 ve ve a ni a, khaw dangah Vawk thi leh suat chhinchhiah belh a awm lo thung a ni. Heti hian Serchhip District-a Veng leh khua 21-ah kumin hian ASF hri hmuh a ni tawh a, Vawk thi 1825 leh Vawk suat 1067 awm tawhin Vawk thi leh suat zawng zawng hi 2892 zet a ni tawh a, chhungkaw 679 ten he hri hi an tuar tawh a ni.

Chhinchhiah chinah Thenzawl hi ASF hri leng tuar nasa ber an ni mek a, kumin hian Vawk thi 480 a awm tawh bakah hri leng darh zel tur venna atan Vawk 134 suat a ni tawh a, chhungkaw 164 ten he hri hi an tuar a, Chhingchhip-ah Vawk thi 208 awm tawhin Vawk 268 suat a ni tawh bawk.