Aizawl Smart City Ltd. sum hmanga Mizo High Sikul Field chei thar hawn a ni ta
Mizo High Sikul Field chei thar hawnna ah hian Chief Minister Lalduhoma chuan he project hi sawrkar hmasate bul tan a nih thu leh hmalakna tha tak an lo kalpui avangin lawm takin an chhunzawm tih a sawi a, “A tirah project hming dang an lo vuah a, mahse kum tam tak Mizo High Sikul Field kan lo tih tawh, infiammi tam takte lo chherchhuak tawh kha a hming han thlak atan chuan a uiawm lutukin kan hria a, Mizo High Sikul Field tiin kan thlak leh ta a ni,” a ti a. A enkawl zuitu tur Management Committee-ah sawrkar aiawh bakah Zarkawt Local Council-te, tlawmngai pawl hruaitute leh Mizo High School Principal te an awm dawn thu sawiin, “Mizo High School leh HSS te chuan man chawi lovin an duh hun hunah an hmang thei dawn a, Zarkawt LC leh NGO te, Zarkawt Presbyterian kohhran ten a thlawnin an hmang thei bawk ang. A hnuaia Parking Area enkawlna hna pawh hi Zarkawt Local Council kutah bawk kan dah a ni,” a ti.
Chief Minister chuan helai hmunah hian kum 130 liam tawh ah khan Missionary ten Biak In an lo sa tawh tih sawiin, “Chu mi hriatrengna chu awm thei se tiin Zarkawt Kohhran ten rawtna an rawn thlen a, sawrkar pawhin rem a lo ti a. Biak In hmasa ber ang turin In te dah a ni a, tawngtai nana hman tur a ni a. Hei hian he hmun hi a tihlu zual a ni,” a ti bawk a. Chief Minister bakah hian UD&PA Minister K. Sapdanga pawhin thu a sawi bawk a ni.
He Field chei tharah hian a hnuai lamah lirthei dahna chhawng hnih awmin Four-Wheeler 80 leh Two Wheeler 47 a dah theih a, tui litre 35,000 dahna awmin Public Toilet leh Security Room a awm nghal a. Field chungah a kualin ke-a kalna (elevated jogging track) te, Field sira Cycle-a tlanna kawng te, Cricket practice Pitch te a awm a, Stage, Toilet leh Store Room te neiin naupang infiamna hmun leh Open Gym a awm a, huan (garden) a nei bawk a, Water Cooler awm bawkin Mizoram-a Biak In hmasa ber dinna (6.10.1896) hmun a nih angin Biak In hmasaber ang tak In te sak a ni bawk.
A Field-ah hian phullem phah niin a sei zawng meter 73.35 leh a zau zawng meter 33.12 a ni a, mi 310 thut theihna awmin Lushai Engineer te chu June ni 10, 2022-ah Contract Agreement ziahpui an ni a, February ni 4, 2023-ah tna tanin kumin August ni 10 khan an zofel a ni.